Un tempo hopi dificil ta dilanti porta y nos isla ta manera un barco sin capitan. Nos ta wordo goberna pa hendenan cu no tin un curason sincero y mucho menos leal na nos Aruba dushi tera. Hendenan cu durante campaña ta gaña pueblo y ora nan ta na poder ta destrui Aruba. Si nos tabata tin gobernantenan leal y sincero nos isla lo un perla den lama Caribe. Si nos mira e situacion cu nos ta bibando aden, e ta duna nos mas gana di yora. Gobernantenan a traiciona nan propio isla cu un tempo tabata respeta.
Na mas di un ocasion partido Curpa a expresa cu e fundeshi di nos isla ta corumpi y ta fofo. Mester bin un limpiesa completo pa asina por cuminsa construi riba un fundeshi limpi y solido. For di 2004 pa awor den 2024 gobierno tras di gobierno a hinca nos pueblo den debe y den miseria y p’esey nos ta bisa cu nos gobernantenan no ta fiel na nos isla. Nos debe nacional ta riba 6.2 biyon florin. Si nos mira kico ta pasando den e ultimo tempo riba nos isla nos por bisa sigur cu nos isla ta den un direccion robes. Un direccion cu no ta hiba na un prosperidad. Partido MEP y partido RAIZ ta hibando nos isla na un destruccion y nos tin e parlamentarionan supuestamente cristian cu en bes di realisa cu e direccion ta robes ta prefera di apoya inhusticia na e pueblo. Diaranson dia 14 di februari 2024 lo tin un caso contra pais Aruba. Laga nos mira con e lo bay desaroya.
Economia di Merca lo bay crash. Lo bay ta dianan duro. Nos por mira e welga general cu tin na paisnan Europeo y esaki lo bay trece scarsedad di cuminda. E caida di e imperio Americano a cuminsa caba cu introduccion di BRICS. E caida di e dollar combina cu e crash di stock market lo bay pone nos para keto. Laga nos corda cu nos florin ta mara na e dollar. Kico esaki lo significa pa nos fondo di pensioen? Nos florin lo bira mesun cos cu e bolivar di Venezuela? Nos sa cu banconan Central rond mundo a cumpra oro. Nos fondo di pensioen tin oro cu por scapa e fondo di pensioen? Lo bay tin gritonan di dolor paso gobierno no tin solucion. Manera tur pais e agenda 2030 lo bay trece problema pa nos isla tambe y lo bay termina den un protesta. E lunanan nos dilanti no lo mira con hopi nos isla lo bay wordo afecta. Laga nos mira kico lo bay pasa, paso e mesun polisnan cu a kita e 12.6% for di nan salario y cu ta gana 705 florin menos cu otro empleadonan publico, ta esun yama pa mantene orden publico.
Ora husticia di un pais faya henter e pais ta bay malo y ta cay den decadencia. Den medio di comunicacion nos por a tende di un scandal den nos Cuerpo Policial y no ta for di awor. No por sigui tapa cosnan cu ta contra ley. Ora cu e chikito ta haci malo mes ora ta schors e, pero ora top di nos Cuerpo Policial ta hacie den secresia ta haci comosifuera cu nada no a pasa. Si ta di berdad esaki a sosode anto esunnan cu a tapa e scandal ta bira complice di maldad y ta di condena. Ley no por conta pa e chikito si y pa e otro no. No por midi cu 2 midi.
E Dios cu nos ta sirbi ta un Dios husto. Dios lo no sigui tolera inhusticia y Su vengansa ta na porta. Ta basta di inhusticia y ta basta di maltrato. Nos gobernantenan ta sigui den nan mal caminda y no kier hala di nan mal caminda y lo tin cu sufri e consecuencia di locual cu nan mes a sembra. Tempo di Dios ta perfecto.
Partido Curpa ta e unico alternativa.
