Partido CURPA ta felicita y gradici nos obreronan den e tempo dificil aki. Masha masha pabien riba boso dia. Mientras rond mundo trahadonan cu tabata forma parti di e frontliner durante covid19 a wordo recompensa, aki na Aruba nos tremendo gobierno a sacrifica nos frontlinernan door di baha nan salario.
Nos gobierno a bay Hulanda y a bisa di lo kita 12.6% for di empleadonan publico y trahadonan den e area di salubridad. Mientras otro departamentonan no a entrega ni un debchi. Gobierno di un manera dictatorial a tuma medida riba e clase trahado,pero nos tin sigur cu dia prome di mei lo felicita e clase trahado. Tambe ta gobierno a dicidi di kita 60 miyon florin di AZV den un tempo di crisis. Gobierno ta prefera di laga pueblo muri cu saca un man y brinda pueblo ayudo y mas pio ainda gobierno no ta worry cu salud mental di nos pueblo. Nos grandinan y esunnan cu no tin trabao nan placa no ta yega ni pa nan come corda pa paga nan eigen bijdrage na remedi. Nos pueblo tin di biba den miseria paso e onderstand y pensioen di awg.1300,= no ta yega pa tin un miho nivel di bida. Pueblo esaki ta e agenda 2030 di World Economic Forum. Lo bo no tin nada y lo bo ta feliz. Nos ta keda ripiti e frase aki paso cada dia cu pasa mas y mas nos ta mira e realidad. Hasta e clase media mester lucha pa sobrevivi.
Partido mep ta pusha su campaña ban topa pa mira si tin hende cu ta sigui nan ainda. E mesun partido cu a priminti di goberna sin medida. Un partido socialista ta un partido mentiroso cu ta priminti y nunca ta cumpli. Un partido cu ta sembra miedo y destruccion pa despues bin goberna cu medida. Si sigui trayecto di e partido aki nunca el a duna pueblo nada. Semper ora partido mep ta den gobierno bo ta mira miseria ta lanta cabes. Un gobierno cu ta malgasta placa di pueblo y tin como lema “nos prome, nos di dos y pueblo keda sufri numa”.
Laga nos mira si nos prome minister lo bay parlamento pidi pa ayudo paso su gobierno a masacra pais Aruba y Hulanda a dun’e e cabuya y awor e no por bay ningun caminda mas. Aruba ta hipoteca y no ta haya prestamo si no firma e decreto real esta RAFT. Gobierno no tin 2/3 den Parlamento pa caba di entrega nos autonomia. Nos gobiernonan den e ultimo 20 añanan no a sa di administra 24 biyon florin cu ta placa di pueblo.
Nos por corda cu prome minister a expresa cu den luna april/mei 2023 e ley di matrimonio di mesun sexo lo yega Parlamento pa wordo trata. Nos di partido CURPA a vocifera mas cu un biaha cu si e ley aki wordo trata den Parlamento mayoria lo vota na fabor di e ley aki. Nos ta papia di entre 15 pa 16 lo voto na fabor. Dia prome di maart 2021 ya caba 17 Parlamentario a vota na fabor di nos codigo civil y asina aproba e geregistreerd partnerschap. E tempo ey ni Tevreden ni Guedez a pensa pa a benta gobierno abao sino a sigui cobra nan salario cu ta mas importante cu para na banda di leynan di Dios. Ningun partido politico den Parlamento tin temor di Dios. Por papia di Dios pero nan curason ta leu di Dios. Nos no por spera otro for di un gobierno cu a firma cu World Economic Forum cu ta pusha e agenda 2030. Si den pasado partidonan mep y avp a brasa otro pa aproba e amienda 7 mucho menos nan lo bay contra di nan mes. E supuesto cristiannan den parlamento ta prefera di laga esunnan cu ta kere den Dios wordo sacrifica cu para banda di e pueblo Cristian. E agenda 2030 ta contra di e famia y contra di e pueblo Cristian.
Partido CURPA ta e unico alternativa y no tin otro. Nos Dios ta un Dios di sorpresa y nos ta kere cu lo tin sorpresa.
