Diabierna 24 di mei 2024 nos prome minister a tuma e decision di firma e Rijkswet. Asina tambe nos prome minister a entrega nos autonomia na Hulanda. Un Status Aparte cu tabata un lucha di hopi aña pa a yega su fin. Aruba su Status Aparte tabata unico den reino Hulandes, pero awe no tin ningun balor mas. Nos por corda expresion di difunto Gilbert Francois Betico Croes cu si mishi cu Aruba su Status Aparte esey kiermen guera. Betico Croes lo draai atrobe den su graf, paso Hulanda a logra pone Aruba na rudia. E supuesto“logro hibrido” di nos prome minister lo keda graba den nos historia cu nomber y fam. E fecha 24 di mei 2024 ta keda graba mesun cos cu 18 maart.
Despues cu nos ministro di finansas no a logra haya $160 miyon fia no a keda minister president nada otro di entrega Aruba su autonomia. Por ta cu no por a haya un prestamo paso gobiernonan di ultimo 22 aña a sink Aruba den debe. Diripiente nos por a tende cu ministro di finansas a sali diadomingo ultimo di biahe pa Merca pa busca finansa di $160 miyon. Si Aruba ta bao di curatela y tur cos lo wordo dirigi for di Hulanda ta kico e minister di finansas ta bay busca? Kisas ta un biahe di despedida paso e gobierno aki a entrega e poder na Hulanda. Parlamentarionan por wel di bai cas paso nan no tin bos mas y pa kico gasta placa.
Situacion mundialmente ta cambiando. E resultado di eleccion na Europa lo trece un cambio di 180 grado den e Mundo politico. E pueblo Europeo no kier tende mas di partidonan socialista. E parti di Alemania cu tabata comunista a vota pa libertad y a vota pa partido derechista/conservador. Esaki ta hasi cu e plan di Sustainable Development Goals ta cay na awa. Nacionnan Uni su gobierno globalista a fracasa. E resultado di eleccion Europeo a haci cu president Macron di Francia y prome minister di Belgica a disolve parlamento y a yama eleccion.
Aki na Aruba tambe nos tin un gobierno socialista cu a fracasa y a sink Aruba mas den debe. Nos prome minister mester tuma ehempel di paisnan Europeo y bay gobernador y disolve parlamento y yama un eleccion den 90 dia. E gobierno aki no ta integro paso unabes cu husticia drenta cas di gobernacion pa investigacion ta demostra cu tin suficiente prueba pa a drenta Cocolishi. E lo por tarda pero e lo bati nan porta tardi of tempran.
Den 5 aña di tempo president di El Salvador a transforma e pais di crimen pa un pais di pas y di progreso. E presidente a declara cu esaki por tabata posibel cu ayudo di nos bon Dios. Aki na Aruba nos gobierno den 7 aña di tempo a sink nos Isla den debe y pon’e bao curatela. Un isla cu un turismo florescente pero cu su finansas ta manera un bari sin bom.
Esaki ta tempo di Dios y no di politiconan. Dios su tempo ta perfecto. Esaki ta e tempo pa Aruba core cu politiconan di promesa falso cu nunca a cumpli cu pueblo. Politiconan cu ta bay contra leynan di Dios cu ta trece maldicion pa nos Isla. Partido Curpa ta e unico partido cu leynan di Dios no ta negociabel. Partido Curpa ta e unico alternativa.
