Pa dia di San Valentin, MetaCorp a dicidi di parti 938 cupcake pa tur empleado na Aruba y Corsou. Na e mesun momento a duna bek na comunidad y pa e motibo aki a traha hunto cu Cupcake di Speranza cu e iniciativa di GLW Foundation, cu ta recauda fondo pa medio di benta di cupcake pa entre otro Baby Jeremiah y Famia Rasmijn.
Baby Jeremiah actualmente ta na Colombia pa su salud. E ta sufri di Tetralogy of Fallot, cu ta un defecto for di nacemento cu ta afecta e fluho normal di sanger den curason.
Esaki ta sosode ora cu un baby su curason no a forma bon mientras cu e baby tabata crece den e barica di e mama.
MetaCorp, cu den e ultimo tres añanan a forma parti di e iniciativa aki, a dicidi di no solamente cumpra cupcakes pero pa haci un donacion di AWG 10.000 pa haci un impacto real den e bida di e Baby Jeremiah.
MetaCorp ta desea di felicita GLW Foundation y ta aplaudi nan pa nan compromiso pa yuda miembronan vulnerabel di nos comunidad aña tras aña.
