Dia 14 di juni Bloedbank Aruba na Horacio Oduber Hospital a celebra Dia di Donante di Sanger. Den cuadro di e dia mundial aki Bloedbank Aruba tabatin un “open house” unda por a inscribi pa asina bishita e facilidad, cera conoci cu e team y tambe siña e procedura con pa bira donante di sanger y alabes con un donacion di sanger por salba tres bida.
Fabian Werleman, Coordinado di Bloedbank Aruba, a expresa cu e dia aki tabata un dia special pasobra ta reconoce e bunita gesto y ta gradici e donantenan di sanger existente y alabes pa recorda un y tur cu Sanger ta uni nos. Sin e donantenan di sanger, Bloedbank Aruba no lo tin e sanger necesario pa tur cu mester di esaki pa salba nan bida. Mayoria di hende no sa cu un donacion di sanger por salba te cu tres bida.
![](https://24ora.com/wp-content/uploads/2024/06/5C8A9003-Large.jpeg)
Actualmente na Aruba tin 1300 donante activo, sinembargo pa un isla manera Aruba, ta necesario pa tin alrededor di 3 mil donante di sanger. Sanger ta importante por ehempel na momento cu hospital mester asisti un herido di accident grandi y grave, durante un operacion grandi, durante un parto, tambe sanger p’e pashentnan cu ta haci kimoterapia y hopi mas. Durante un dia, Bloedbank ta entrega 10 saco di sanger sea ta pa hospital mes of ImSan.
![](https://24ora.com/wp-content/uploads/2024/06/5C8A8934-Large.jpeg)
![](https://24ora.com/wp-content/uploads/2024/06/5C8A8957-Large.jpeg)
![](https://24ora.com/wp-content/uploads/2024/06/5C8A9003-Large.jpeg)
![](https://24ora.com/wp-content/uploads/2024/06/5C8A8970-Large.jpeg)
Algun di e rekisitonan necesario pa bira donante di sanger ta cu bo mester tin e edad entre 18 cu 65 aña y ta conta cu un bon salud, pues por ehempel no tin malesa contagioso, no ta diabetico, no ta pashent di curason ni tampoco hende cu a sobrevivi cancer. Y mas importante ainda e gana di duna bek na comunidad.
Team completo di Bloedbank Aruba na Horacio Oduber Hospital ta gradici tur e donante na Aruba pa nan tempo y e bunita gesto di nan pa duna bek na comunidad. Y si bo no a logra pasa pero kier bira donante di sanger por subi www.bleodbankaruba.aw y yena e formulario. Despues di yena e formulario, Bloedbank ta inicia cu e proceso pa bira un donante di sanger.