Dos dia despues di e eleccion parlamentario di Sint Maarten, ya caba tin un coalicion cu lo apoya e gobierno nobo di Sint Maarten. Ta papia di e partidonan Unified Resilient Sint Maarten Movement (URM); Democratic Party (DP); Party For Progress (PFP) y Nation Opportunity Wealth (NOW) a forma un coalicion cu lo goberna e pais for di 2024-2028.
Nan a firma un acuerdo di coalicion diasabra anochi marcando e inicio di un era nobo di un gobierno di cooperacion entre e partidonan menciona. Lidernan di tur e partidonan y diferente miembro tabata presente durante e ceremonia y a priminti union y progreso pa e avance di Sint Maarten y su ciudadanonan.
E acuerdo ta un vision combina di e partidonan unda cu a enfoca riba dos aspecto principal: Desaroyo economico y bienestar social combina cu sostenibilidad. Na final e lidernan a expresa nan entusiasmo pa e colaboracion aki y a enfatisa riba e union cu cu mester prevalece na e pais y cu a sobresali den e acuerdo di colaboracion aki. Meta ta un futuro prospero y resiliente pa e isla aki.
Diferente lidernan di mundo comercial tambe tabata presente y a mustra entusiasmo pa e colaboracion historico aki pa motibo di ta diferente di e politica cu a domina e isla den pasado.
Tur a priminti di traha hunto pa cumpli cu loke a priminti durante campaña.
E reparticion di carteranan a duna e resultado aki: URSM a haya prome minister y Ministerio di Asuntonan General; Ministerio di Salud Public, Asuntonan Social y Labor; y Vice Minister Plenipotenciario. Partido Democratico a haya: Ministerio di Turismo, Asuntonan Economico, Transporte y Telecomunicacion (TEATT); Finanza y Presidencia di Parlamento; Partido pa Progreso (PFP) a haya: Ministerio di Vivienda Publico; Medio Ambiente, Desaroyo Espacial y Infrastructura (VROMI); Vice Prome Minister; Minister Plenipotenciario; 2do Vice Presidente Parlamento. Y partido NOW a bay cu: Ministerio di Educacion, Cultura, Hubentud y Deporte (ECYS); Husticia y Prome Vice Presidente di Parlamento.
