Comerciante Uni Aruba (CUA) a organisa e charla “Business is Not an Overnight Success” unda cu un cantidad di miembro comerciante tabata presente. Dos orador invita p’e charla aki tabata CEO di Aruba Tourism Authority (ATA), Ronella Croes y CEO di MetaCorp, Eduard “Eddie” de Veer.
Frans Ponson, presidente di CUA, a indica cu e evento a bay miho di loke a spera. Nan ta contento cu mas di 180 miembro tabata presente. Esaki ta un crecemento substancial pa CUA, incluso a nota mas interes di e miembronan. Nan tabata contento cu e oradornan.
Ponson ta kere e oradornan Ronella Croes y Eddie de Veer a relaciona cu e comerciante local. El a indica cu esey ta algo cu CUA kier trece padilanti, unda kier p’e miembronan trece dilanti nan experencia, loke nan a pasa den nan compania hunto cu un orador.
Ronella Croes a trece dilanti cu Aruba ta depende di turismo, tambe a papia riba e vision cu Aruba tin y esaki tabata interesante pa tur hende. Hunto cu esey un miembro di CUA a trece su profesionalismo, con el a pasa cu ne. Y cu comercio den e ultimo binti pa trinta añanan tabata hopi impresionante.
Durante e charla Frans Ponson a scucha cierto cos impresionante y cu tabata touch curason di cualkier comerciante cu tabata presente n’e charla. E tabata un experencia fenomenal. Segun Ponson, e tabata impresiona door di e oradornan. CUA tabata masha contento pa tabatin e dos oradornan aki y tabatin un evento di “Business.”
CEO di ATA, Ronella Croes, a expresa cu e audiencia aki ta uno hopi valioso pa nan, como tambe diferente otro grupo den comunidad. ATA ta gradicido p’esaki y di a tuma e oportunidad aki pa comunica cu e sector comercial. Pa ATA tabata importante pa reconoce e retonan cu ta existi den e industria di turismo. A tende di e preocupacionnan cu tin eyfo, proyecto cu ta nifica expansion di turismo. Expansion cu 900 camber pa otro aña. Esaki ta brinda oportunidad pero tambe reto.
E ta bay pa reconoce como tambe ilustra kico ta e strategia cu mester aplica pa maneha turismo di un manera duradero den e añanan cu ta sigui. Tambe ATA a trece dilanti e parti di desaroyo sostenibel, kico t’e componentenan pa yega n’e esey, e importancia cu e biahero ta duna n’esey. A trece dilanti e parti di aplicacion di tecnologia cu ta e futuro pa e empresanan y basicamente pa turismo tambe. ATA a trece dilanti e parti di mercadeo di nan parti responsabel, di cual a splica con nan ta haci esey y a comparti diferente punto.
Refleha riba reto
A refleha riba e retonan cu ta mira como Aruba no ta unico. A base mundial tin otro cu ta confronta mesun reto. Ta pensa riba e scarsedad di forsa laboral, tin di pensa con pa proteha naturalesa, medio ambiente, unda tin turismo ta tuma luga. Cada hende cu move di un sitio tin su impacto, kiermen con ta hacie.
Eduard de Veer, CEO di MetaCorp, a probecha pa comparti mensahe na e comerciantenan presente cual tabata riba e compromiso “cu bo ta haci cu bo mes.” E consistencia cu tin di duna na bo mes pa sigui cu e trayectoria di a dicidi di tuma. Tambe mantene e enfoke riba e obhetivo poni dilanti y nunca rindi.
Momento cu e tabata riba e stage, de Veer a comparti cu e sala parti di su trayectoria cu e compania y obstaculo cu el a topa na caminda. Tin di e obstaculonan cu el a surpasa y tin cu e no a logra. Sinembargo, e perseverancia pa sigui bay dilanti ta refleha den un carera di binti aña na Tropical Bottling. E decision di sigui emboteya ta resulta den loke tin awe. Si e decision tabata pa bira un distribuido, e storia lo ta uno diferente.
Na momento di refleha riba esey, e pregunta cu ta bin dilanti ta “con mi a logra esey. Kico ta e factornan cu a pusha mi pa mi logra esey.” Segun Eddie de Veer, esey tabata algo cu su persona a comparti cu e audiencia, p’asina nan mira cu nan retonan ta conoci den empresa chikito y grandi. Asina aki nan por haya un inspiracion pa sigui bay dilanti.
