Despues di 10 aña, pa e cantante SASHAH, tabata un experiencia cu a trece hopi emocion y satisfaccion, grabando un biaha mas cu su banda faborito di tur tempo Tsunami Aruba
Un soño cu a bira realidad y principalmente, haciendo esaki cu un propio composicion cu ta hiba como titulo “BiN”, a hacie mas special ainda. E proyecto aki, cu origen basa riba e esencia di “Ritmo Tsunami“, ta significa, reconecta profundamente cu e estilo musical y e sonido unico, cu a sa di defini Tsunami durante hopi aña. BiN ta un composicion di Sashah Figueroa y aregla pa Michael Odor.
E alegria di crea musica hunto atrobe, tabata sublime. Cada momento di preparacion di e cancion, tabata yena cu e energia, di no solamente e coleganan y integrantenan talentoso, sino tambe di tur cu tin e conexion extenso y cu ta compronde e rumbo di Tsunami.
“Sumamente agradecido, pa e oportunidad aki…Sumamente contento, pa bolbe sinti e magia, cu na prome instante a inspira nos”, tabata palabra di Sashah Figueroa.
Trahando riba e cancion nobo “BiN“, a permiti pa mescla e estilo “Tsunami” cu diferente influencia nobo, creando algo cu ta sinti fresco y cu ta trece e nostalgia familiar. E regreso di e origen di e “Ritmo Tsunami“, presentando “BiN“, no ta solamente pa bay bek den tempo sino tambe pa celebra Tsunami su 20 aña di existencia, mirando padilanti y mirando tur loke tin pa Tsunami den futuro.”BiN“, ta un recordatorio di con conhuntamente na pricipio, Tsunami a cuminsa cu forsa y pasion cu su musica y un recordatorio di con a comparti esaki semper.
Tsunami a bin pa keda y lo t’ey pa produci mas composicion manera esunnan mas gusta, pa asina sigui biba e legado di Tsunami Aruba. Tin e oportunidad pa cada persona na mundo henter disfruta di e tema “BiN”, na cualkier momento di dia.
E cancion ta obtenibel riba tur plataforma social y plataforma di transmision, incluyendo esunan mas popular, djis pa menciona algun cu ta Spotify, Deezer, Tidal, iHeart Radio, Pandora y Youtube Music. Riba Apple Music y Amazon Music, tambe e lo ta obtenibel.
