Minister Mike de Meza tabata na Miami pa reuni cu presidente di Citgo, sr. Jose Perreira, hunto cu un delegacion pa 24 ora, hunto cu su staff, su delegacion di ehecutivo, caminda cu a firma un MOU, cual lo bay duna pa Citgo, hunto cu Refineria di Aruba, hunto cu utilities Aruba, hunto cu WEB Aruba NV, bay sinta na mesa, analisa, wak full e proyecto di rehabilitacion y despues den operacion, y e capacidad cu WEB tin disponibel y por pone disponibel pa suministro di coriente y awa potabel, awa industrial tambe, pa e refineria. Ta algo sumamente grandi pasobra na e momento aki, aumentando e capacidadnan di WEB ta nifica tambe un entrada substancial pa WEB, cu ta fortalece e relacion y tambe e situacion financiero di WEB ainda mas, cu ta un compania cu ta core saludabel. Pero esaki ta pa engrandece su suministro cu ta sumamente interesante. Semper tabata algo cu WEB tabata interesa den dje.
Den pasado tabata tin diferente momento door di añanan cu WEB a sa di suministra adicional coriente y awa pa refineria. Awor aki e presidente di Citgo tambe, cu tin su ehecutivonan, e team di Citgo Aruba, hunto cu WEB ta bay sinta na mesa den un comision pa bay analisa tur cos y wak e diferente necesidad y rekisitonan cu tin y con WEB den esaki lo bay asisti, como un partner strategico, traha hunto cu Citgo.
Monitoreo
Minister de Meza a splica cu tin un bon relacion sumamente positivo cu Citgo local, pero Citgo internacional tambe. Manera cu por a mira, tin un relacion sumamente estrecho cu hasta e presidente di Citgo actual, tambe cu e presidente anterior, kende ta minister di Energia y Minas na Venezuela, kende ta Nelson Martinez. E relacion ta sumamente positivo, hunto cu Refineria di Aruba, cu ta un compania estatal. Ta mira e relacion tambe cu WEB y Citgo, Utilities y Citgo, ta e partnernan strategico cu kier na Aruba pa engrandece e economia di Aruba y tambe percura pa henter e operacion di Citgo ta sostenibel. Asina aki tin cu anda cu e partnernan strategico, caminda cu den bon ambiente, manera profesional, ta sinta na mesa, yega na solucionnan pa largo plazo y solucionnan cu ta Win/Win Situation. E minister ta sumamente contento cu e solucion cu ta trahando riba dje pa e ultimo 3 awo bayendo pa 4 aña. E resultadonan ta positivo. Manera cu por a scucha di e presidente, tin 400 hende trahando den e refineria y ta mira cu e lunanan nos dilanti, esaki lo bay redobla. Pa fin di aña mester tin porlo menos 800 pa 1000 hende ta laborando den e refineria. Pa 2018, lo bay bira sumamente druk, e ora e gran parti di tur e trabao cu tin cu tuma luga, facilmente ta yega e ora na 2000 hende plus, cu lo ta trahando eyden, pa purba di yega na fin di aña, cu por tin mita di e refineria den operacion y despues e otro mita. Ta bayendo den un bon direccion.
Pueblo por ta sigura di un rehabilitacion cu ta bay den bon esfera, cu ta bay riba un bon standard, un bon manera, acelera, cu na fin di dia ta nifica cu hopi di nos Arubianonan cu tabata traha eyden, por traha un biaha mas den e refineria y tur e mucha y hobennan cu ta cabando scol, por bin bek Aruba y esunnan cu ta na Aruba mes, tambe por haya trabao den e refineria directamente of indirectamente.
No lubida cu e presencia di e refineria den operacion ta nifica por lo menos un 3 pa 5 mil cupo di trabao directamente of indirectamente y ta un contribucion sumamente grandi pa nos economia.
Cumpliendo
Den tur cos Citgo ta cumpliendo. Den nan pagonan nan ta cumpliendo, den afspraaknan nan ta cumpliendo. Den timelinenan nan ta cumpliendo, riba un nivel profesional Citgo ta trahando y ta cumpli cu su debernan na Aruba. Ta un relacion di respet mutuo y e minister ta contento cu esaki.
