Aña a bolter y problema di pareha a bira pan di cada dia. No por keda sin menciona cu gran mayoria ta e hende muhe como e agresor of esun cu un of otro arma den man. Ta diferente caso caba por a tuma nota cu e homber ta resulta herida y/of transporta cu ambulance despues di confrontacion formal cu pareha/casa den cas.
Esaki tambe ta un caso, el a tuma luga diaranson anochi laat, ora cu a pidi presencia di polis na un cas na Tanki Leendert pa un situacion tenso entre pareha cu a escala di tal forma cu e por a bira un desgracia serio.
Un señora cu cuchiu den man tabata core tras di su casa den e area, na momento cu el a tuma nota di e patruya policial, el a core drenta cas bek. Polis mesora a baha ya bay atende cu nan.
A purba interveni y clarifica na e pareha cu locual ta tumando luga ta algo serio y no por ta asina cu ta core tras di casa cu arma blanco den man. Sigur no ta algo cu ta haci cu bon intencion mirando cu e kier a hinca e homber cu e cuchiu.
Polis a indica na e señora cu lo ta consehabel pa e retira su mes di e cas pa e anochi ey, busca otro caminda pa pasa e anochi, na un familiar por ehempel y laga e situacion calma poco prome cu bay sinta bek cu e homber.
