Cu certificacion den man: Varios empleado di Departamento di Impuesto a avansa den mundo di fiscalidad
For di Departamento di Impuesto a ricibi e noticia cu su ekipo di FIOT y Control, a ricibi nan certificacion di Universidad di Corsou, caminda cu recientemente nan a sigui diferente curso di e avancenan den e mundo di fiscalidad.
Tur cursista a logra gradua cu cifra impresionante y ta un testimonio di nan dedicacion y experticio. Kathleen Malberg y Elvis Tromp t’esunnan cu a sobresali cu mas exito y tabata e miho graduadonan.
Esaki sigur ta un logro grandi pa Departamento di Impuesto, cu a felicita su ekipo. Den un publicacion riba Facebook, nan a indica tambe, cu e Departamento ta kere den ekipa su profesionalnan cu e miho hermentnan y conocemento fiscal pa sobresali den nan trabou.
E certificacion aki no solamente ta resalta nan compromiso pa excelencia, sino tambe ta subraya e importancia di keda na vanguardia den e mundo dinamico di impuesto.
Mientras e Departamento ta continua cu su adaptacion n’e paisahe di impuesto cu ta cambia constantemente, e certificacion aki ta ekipa nan pa sirbi e pais ainda mas miho, caminda cu e guia n’e contribuyente p’e por cumpli cu su responsabilidad di impuesto ta sumamente importante.
Confiansa di comunidad y su sosten ta stimula e Departamento pa pusha su limitenan y adapta nan cultura di trabou.
