Ta apenas dos dia pasa cu husticia a drenta den cas di gobernacion relaciona cu e caso Portulaca, caminda ta investiga posibel corupcion cu permiso di DIMAS. A drenta no solamente den Cocolishi n’e ministerio di Glenbert Croes pero tambe na DIMAS, cas di Betico Croes, oficina di ruman homber di Glenbert Croes, un cas na Barcadera y segun a compronde, algun sitio mas. Entre nan, tin tres persona deteni pa cu e caso aki. Ta hopi straño cu a drenta cas di mayornan di Minister Glenbert Croes y asina mes no a apunt’e como sospechoso. Tur hende afo ta mira cu e enfoke, lo ta riba Glenbert Croes pero cu lo ta “armando su cos p’e.”
Despues di dos dia, e minister porfin a sali y enfrenta prensa local pa cu e situacion actual. Pa dos dia largo, su conseheronan no a lag’e enfrenta prensa y mas bien a haci grabacion den camber cera y publica, sin espacio pa hacie pregunta. Diahuebs atardi a topa cu e minister na su salida pa Europa y asina logra haya su prome entrevista despues cu a inicia e caso cu ta hopi cerca di dje. Croes lo ta dos siman na Europa pa cual riba 20 di juni lo yega bek Aruba.
Despues cu a haci e entradanan hudicial a nota cu un cheque a “leak”. Ta trata di un cheque di dies mil florin den pleno campaña pa su fundacion politico. E mandatario ta haya masha straño cu niun tempo no a mira e cheque den publicacion, pero diripiente despues di accionnan di Ministerio Publico, e cheque a lek. E mandatario riba su mes no tin problema pa habri buki y mustra pueblo ken a dun’e placa pa campaña. Hasta e ta reta su opositornan politico pa habri buki pa mira ken a haya cuanto placa pa por core campaña. Croes tin fe cu e investigacion lo trece hopi claridad.
No obstante e investigacion ta den pleno velocidad, Croes a comenta cu su trabou tin cu sigui y e ta keda como minister.
Croes ta sinti masha fastioso cu husticia a drenta cas di Betico Croes hasta ta un acto cu ta molesti’e. Husticia den nan entrada hudicial a topa cu su señora mama di ochenta aña den cas. Croes hasta ta pensa cu no tabata necesario pa drenta e cas di su mayornan. E mandatario ta convenci cu el a traha di un manera drechi y e no a tuma placa pa ningun fabor. Desde 2017 e mandatario a indica cu el a bin ta combati corupcion, claro, e no ta gana amigo sino enemigo so!.
E no ta ni teme cu e lo bira e proximo politico sospecho, mirando cu e ta 100% cu e no a haci nada malo ni contra ley, pues e ta biba trankilo. Aunke pa casualidad, pero e mesun oficina cu Minister Glenbert Croes ta sinta aden, caminda a tene entrada hudicial, t’e mesun oficina caminda den pasado a yeg’i drenta caba, e tempo ey Paul Croes como minister. Tabata hopi cla den e investigacion IBIS cu ora a drenta, a pone diferente aparatonan pa scucha combersacionnan y hasta den auto di e minister.
Segun Minister Croes, si tabatin camara etc pa vigila e minister, nan lo t’ey ainda, pero e ta consciente cu sea un gobernante, bo mester wak bon con ta anda den comunidad. Na final Croes a enfatisa cu e lo sigui pa eleccion 2025, tanten cu e pueblo tin confiansa den dje!.
