Pa por tin un criadero di bestia, den e caso aki di galiña, ta ilegal pa tin uno den bario caminda cu tin cas riba otro (binnen bebouwde kom). Parti pafo di bario si por. Sinembargo e situacion menciona ta uno ahigienico y cu holo fuerte net patras di ward’i polis na Playa, den Zuidstraat.
Mesora a bay atende cu e caso y a duna e propietario di e galiñanan p’e ‘ruim op de boel’ prome cu 3:00 pm, sino lo tuma medida.
Cristino Baez Rosario ta un ciudadano preocupa p’e molester di galiña cu tin den su bario. El a conta cu e tin mas di 25 aña ta biba ey y e bisiña a bin cu hopi galiña y gay. Lamentablemente ningun hende por drumi eynan. E gaynan ta canta y molestia tur hende.
A hala atencion di e bisiña y hasta tabatin confrontacion pa motibo di e bestianan. Baez Rosario a yama polis den varios ocasion, p’asina mira cu nan propio wowo kico ta kico n’e luga.
E luga ta uno decadente y pa colmo den centro di Playa.
Baez Rosario a menciona cu e bestianan riba dje ta hinca den couchinan chikito y no por move tampoco. “E ta un calamidad,” el a menciona.
Baez Rosario no kier un confrontacion cu e bisiñanan y kier a pidi autoridad y minister di salubridad pa pone man na nan curason y bin mira. E kier traha y e kier drumi, cu pa motibo di e gay y e cachonan e no por drumi.
El a reitera cu tabatin varios confrontacion, pero e no por mas. Ta bon mes cu finalmente polis a presenta y tuma rienda di e situacion. Pasobra esaki a bay demasiado leu. Si nan bin menas’e, e ta dispuesto pa loke e bisiña kier, contal di no scucha e desordo banda di su cas mas.
E bisiña mes no a duna cara p’asina confronta e situacion. Diamars un biaha mas a yama polis y nan a aparece, pero door cu no a topa cu e doño, nan a bandona e sitio. Ta varios confrontacion Baez Rosario tabatin riba loke ta pasando, den curason di Playa.
E bisiñanan di bario tambe ta cansa di e situacion ahigienico. Ta haci un yamada na autoridad y gobierno pa nan haci algo cu e animalnan aki. “Aki no tin bestia ta biba, sino hende organisa. No ta husto cu loke nan ta haciendo cu mi aki,” ta loke cu Cristino Baez Rosario a bisa por ultimo.
