Na luna di april Departamento di Mucha y Hoben (DMH) a manda un carta pa tur cabesante di centro di cuido di mucha pa recorda riba loke tabata treci dilanti durante e anochi informativo di dia 8 di april ultimo. Aki DMH a trece dilanti cu nan tin di traha un planificacion di supervision.
Den e mesun carta aki, DMH a informa e centronan di cuido, esta crèche, cu nan ta tene bishita di supervision y ta acompaña pa Polis di Bario. Aki nan lo inventarisa tur loke e centro ta cumpli y tur esaki ta basa riba e Handleiding Kwaliteitseisen Kinderopvang Aruba 2024 (HKE).
Pero, awo tin cuestionamento riba e procedura. Esaki ta debi cu no tin un ‘uitvoerings ministriele regeling’ ni lbhammen. Incluso no tin un ‘toezichthouder’ nombra. Tambe ta puntra a base di cua ley nan lo drenta un creche (woning), pasobra no tin uno.
Un grupo ta sinti cu esaki ta un abuso di poder, mirando cu no tin nada regla. E centronan kier traha hunto cu DMH, pero ta desea di sa mas di e base legal cu e departamento di gobierno tin pa yega drenta e crèchenan. Nan kier sa esaki, pasobra DMH a informa den e carta cu nan tin autoridad pa haci control, pero di otro banda den artikel 155 esaki ta otro.
E artikel 155.1 ta bisa lo siguiente: “Voor het binnentreden in een wonding zonder de uitdrukkelijke toestemming van de bewonder is een bizondere schriftelijke macthiging vereist, onverminderd het bepaalde in her vierde lid. Van het vereiste van een machtiging is vrijgesteld de rechter of de rechter-commissaris, die bevoedg is tot binnentreden zonder toestemming van de bewoner.” Esey kiermen, cu ta rekeri un autorisacion por escrito sin perhuicio di paraaf 4. Esun cu por drenta sin un autorisacion ta un hues of hues-comisario.
Si ta uza artikel 155, e pregunta cu ta bin dilanti ta cu si mester tin un poder di Ministerio Publico pa drenta e crèchenan y kico ta e ‘strafbaar feit.’
E persona cu supuestamente ta ‘toezichthouder’ di DMH no ta nombra segun e landsbesluit di e landsverordening Kinderopvang. Minister Rocco Tjon no a regel e tipo di cosnan aki. Tambe Sue-Ann Ras ta haci ‘onderonsje’ cu Suzy Nadall di Polis di Bario.
Pues ta hopi pregunta tin y awo falta e contestanan. Tur hende ta di acuerdo cu control, pero tur cos regla pa ley.
