Den un siman di tempo a bini decisionnan di corte unda cu ta ataca gobierno of minister fuertemente. E ultimo ta un caso andando di 2019 di un señora cu a sufri un accidente durante Opendag di Brandweer riba 13 di october, 2019.
No solamente e señora / victima (Gwendolyne Maduro) a gana su di tres caso contra gobierno, y tin un mas na caminda, pero hues a bati riba man di gobierno. E ta responsabel pa e sucedido, pa motibo cu su departamento (Brandweer) no a percura pa tin suficiente siguridad, y gobierno mes no ta haci nada pa yuda e victima. Yuda den e sentido pa alivia su dolor ya cu mucho mehoracion no ta spera mas di e lesionnan cu el a sufri riba e fecha menciona.
Esaki tabata di tres decision di corte relaciona cu e accidente aki di 2019, representa pa abogado Gabri de Hoogd, y cada biaha por a nota cu no tin mehoracion. Pa e motibo aki probablemente den e ultimo decision, di dia 6 di december, hues ta bisa gobierno cu “kier señala lo siguiente. Ta masha imprudente di gobierno pa sinta man crusa ta warda den e caso aki. Como resultado, ta perde bon oportunidad pa limita e peso di daño,” por lesa den e decision di corte.
Desde e accidente e victima no a keda 100%, su rudia y pia no tin movibilidad completo y e dolornan ta tur dia. Incluso a dicidi di pone den man di psycholoog.
Corte ta pensa cu loke gobierno por a haci tabata pa interveni den e dificultadnan cu e victima tin pa haya un referencia (verwijzing) di AZV pa sigui tratamento medico na Hulanda. Como e partido responsabel, a splica, a spera cu gobierno por lo menos a tuma e iniciativa pa cubri e gastonan aki. Tratamento exitoso lo por habri caminda pa reintegracion di e victima y na mesun momento limita e daño y perhuicio cu pais Aruba lo mester bay paga na final.
Banda di esaki, corte tambe ta bisa cu ta spera di e partido responsabel cu durante e proceso pa yega na un areglo pa daño causa, e ta tuma un rol iniciador.
Cu decision den e caso aki, unda cu e victima a pidi un adelanto di loke e mester haya for di gobierno (entre otro perdida di salario door cu e no por traha) y algun otro cos mas cu den su mayoria corte a bay di acuerdo cu ne, ta keda pendiente un otro caso mas.
Mirando cu ta fiha caba cu pais Aruba ta responsabel den e accidente, ta na su luga pa yega na descifra kico ta e daño, e dos partidonan yega na un acuerdo riba uzo di un experto medico. E rapport aki mester bay uza pa wak e suma cu e victima ta bay reclama.
Pa esaki no mester inicia e procedura di daño prome. E partidonan ya caba por cuminsa pa sinta na mesa.
Accidente
Dia 19 di october 2019 e victima hunto cu su casa y yiunan a bay e Opendag di Branweer. El a participa na e wega di zip-line. Na final tin un stapel di palet cu no tabata pega na otro y tampoco tapa. Na yegada sinembargo Maduro su pia a pega den un gleuf di e palet y a kibra esaki malamente. Esaki a causa cu e no por a traha for di e tempo ey y ta bou di tratamento medico continuo.
