E conflicto p’e area den disputa di e teritorio di Esequibo cu ta net entre Venezuela y Guyana, tin mas cu un siglo andando. Ta un teritorio cu Venezuela definitivamente ta reclama como di dje, pero, di un otro banda e ex-colonia Britanico di Guyana tambe ta wak e como un teritorio y tecnicamente ta bao di administracion di e pais habla Ingles aki.
Despues di varios aña di disputa, Venezuela a recuri na Corte Internacional di Husticia p’asina resolve e conflicto aki y pa nan dicta na fabor di Venezuela, cual decision a cay diabierna 1 di december y no mucho na fabor di nan.
E SENTENCIA
Manera nos a menciona mas ariba Corte Internacional di Husticia (CIJ) diabierna a urgi na Caracas pa abstene di tuma cualkier accion pa modifica e situacion di e teritorio west di riu Esequibo motibo di e disputa cu Guyana of cu por haci pio of prolonga e pleito dilanti corte, un veredicto dicta prome cu e referendum premira pa Venezuela pa diadomingo awo.
Como contesta n’e peticion di e medidanan provisional door di Guyana despues cu Venezuela a anuncia e celebracion di e referendum aki, CIJ a señala cu “en espera di un decision final den e caso, Republica Bolivariana de Venezuela lo abstene di tuma cualkier accion cu ta modifica e situacion cu actualmente ta prevalece den e teritorio, pa cual e Republica Cooperativa di Guyana ta administra y eherce control riba e zona.”
Di un otro banda Corte Supremo di Husticia (TSJ) a declara diabierna mes, den sesion permanente despues cu e maximo organo hudicial di Nacionnan Uni, a ordo Venezuela pa evita cualkier iniciativa pa compromete e status quo cu Guyana.
“Corte Supremo di Husticia di e Republica Bolivariana de Venezuela, den sesion permanente p’e proteccion y defensa di e derechonan di e pueblo Venezolano,” TSJ a skirbi den ora di mainta riba X, anteriormente conoci como Twitter.
Pa mas detaye lesa TREMPAN
