Kathleen Paskel a gana dos caso mas contra Minister Labor, Energia y Integracion. Ta trata di casonan cu tabata pendiente di aña pasa y awo un veredicto a cay.
Un di e casonan tin di haber cu e prohibicion di entrada na e facilidadnan cu tin di haber cu DIMAS. Resultado di e investigacion riba supuesto incumplimento ta poni den e rapport di Departamento di Recurso Humano (DRH) di 31 di juli 2023. Eyden ta para cu Paskel no a haci su mes culpabel na incumplimento cu ta exigi cu mester a impone un medida disciplinario.
Na opinion di corte, no ta existi base pa impone e medida di ordo unda cu ta prohibi entrada na DIMAS y su facilidadnan. Pa e motibo aki corte ta rechasa y a destrui e decision tuma door di minister pa prohibi entrada na Kathy Paskel.
Despues cu Kathy Paskel a gana su caso den e di dos mita di aña 2023, e minister bou di cual e ta cay, a dicidi pa mand’e pa un periodo specifico na Departamento di Legislacion y Asuntonan Huridico pa haci trabou di hurista. Contra esaki el a entrega obhecion. Mientrastanto tabata trahando riba e investigacion disciplinario cu na final a conclui cu e no a haci su mes culpabel na incumplimento di su tarea. Y tampoco tin medida hustifica pa impone un castigo.
Loke Corte a compronde hopi cla ta cu Paskel no por bolbe mas den su funcion como director di DIMAS. Cu un minister no tin confiansa mas den un funcionario halto, no ta motibo pa hal’e un banda sin mas. Mester protege ambtenaarnan pa no bira e bala di un wega político. Mester protege nan di esaki.
A analisa e caso profundamente y na final a conclui cu Paskel su obhecion riba e decision di minister pa mand’e departamento huridico tin base. Pues a gana e caso ey tambe!
Pa un relato amplio di e dos casonan aki lesa e edicion di TREMPAN di mañan.
