Corte a dicidi: 24ora.com no a gaña riba Endy Croes y el a perde su caso

12 June, 2024, 2:19 pm

Diaranson mainta corte a dicta veredicto den e caso cu Endy Croes (minister den Gabinete Wever=Croes II) a cuminsa contra Tera News (Headlines Group) di e plataforma di noticia mas grandi di Aruba, esta 24ora.com. Corte a rechasa e peticion pa un rectificacion.
Croes a cuminsa e caso pasobra na momento cu a haci publicacion riba 24ora.com cu e tabata un sospechoso y cu el a faborece su famia, a sinti cu a ofende of mancha su nomber.

Na momento di yega na un decision, e pregunta cu hues mester a contesta tabata si e expresionnan haci riba 24ora.com contra di Croes tabata “onrechtmatig”. Den esaki, hues a bisa, tin dos derecho cu ta dal den otro. E derecho di libertad di expresion di Headlines Group y su trahadonan y esun di Croes “pa proteccion di su reputacion”. No tin un ta pisa mas cu otro, segun e hues. Pero loke ta hunga un rol ta e circunstancianan rond di e caso.

Un di e preguntanan ta si e expresionnan haci ta un contribucion na un debate riba interes general. Si esey ta e caso, e ora tin espacio pa duna mas peso na e libertad di expresion. Y lo mester tin motibonan di peso pa limita e libertad aki. Pasobra un debate critico y publico ta necesario pa un comunidad democratico.

Den e caso aki, e expresion ta bini di banda di prensa, cu ta e watchdog di un comunidad. Y e forma con prensa ta expresa e informacion, hayando tipnan di comunidad, ta permiti exageracion y tin biaha hasta den forma provocativo. Si ta haci acusacionnan, e informacion mester ta confiabel si.

Aunke ta papia di un tecnicalidad cu e sentencia di prome instancia no a bay Hof ni Hoge Raad, hues ta bisa cu esaki no ta nifica cu e publicacion di 24ora.com ta “onrechtmatig”. Hues a bisa cu aunke riba 24ora.com ta skirbi hoge raad en bes di herzieningprocedure, esey no ta haci e articulo “onrechtmatig”. E ta bisa cu aunke “e publicacion su terminologianan huridico no ta corecto, no por bisa cu e no ta corecto y inhusto.

Pues no tin motibo pa rectificacion y Endy Croes mester paga tur e gastonan di e proceso.

Pa relato amplio lesa TREMPAN.