Diasabra prome di juni tabatin e competencia Arte di Palabra (AdP) ABC, competencia y intercambio cultural entre e islanan ruman Aruba, Boneiro y Corsou, na K- Center Corsou. Delegacion di Aruba a biaha dia 30 di mei cu 11 hoben, kende a cay den premio di AdP na Aruba. Diabierna 31 di mei, e participantenan di islanan ABC a intercambia cu otro den un wega di “scavenger hunt” na centro comercial Sambil.
E aña aki AdP Corsou a celebra e di 25 edicion continuo di e competencia literario pa alumno di enseñansa avansa na Papiamento. Competencia unda ta celebra talento di nos hobennan y nos idioma Papiamento/u.
Durante di e programa, banda di e competencia tabatin entrega di e tapushi literario, cual ta un contribucion valioso na Papiamento. Di Aruba e baluarte tabata Esmeralda Tromp Jacobs, di Boneiro John Leoneta y Anette Magalie Sumter y di Corsou Stella Pieters Kwiers, Rose Mary Allen, Charles do Rego y Radio Hoyer.
E actividad a conta cu presencia di Minister di Enseñansa, Ciencia, Cultura y Deporte, Sithree van Heydoorn, cu a hiba palabra na cuminsamento di e programa. El a para keto na e union cu idioma por trece y esaki den relacion cu Arte di Palabra.
