Diahuebs awo, 4 di juli, e popular y grandioso torneo Copa Don Elias Mansur t’ey bek. Fanaticada di futbol ta keda cordialmente invita pa yega Solito ya for di 6:00pm. Lo haci apertura y lo duna reconocimento na cuatro baluarte tricolor. Pa 7:00pm en punto lo ranca sali cu e “partidaso” entre e team empeon, cu a caba di promove, Unistars di Pos Chikito vs doño di cas Soldadnan Tricolor.
Pa 9:00pm “otro tabla lo bula” ora CDRA Cayman di Rooi Afo topa cu RCS di Savaneta. E campeonato lo continua diabierna pa 7:00pm cu Estrella vs Caiquetio y sigui pa Brazil jrs vs Riverplate. Diasabra 7or RCA vs CDRA y despues Unistars vs RCS. Diadomingo pa 6’or atardi ta Estrella vs Brazil jrs y 8’or Caiquetio vs Riverplate.
Entrada ta solamente 5 florin pa hende grandi y 2 florin pa mucha. Menu di “Tricolores Corner” lo ta campeon cu Sopi, Burgers, Saté, Pastechi, Loempia, Croquette, Deditos y mas. Lo tin diferente TV screen pa e weganan di Copa America. Bini uno bini tur, apoya bo ekipo den e dushi ambiente na stadion di RCA.
