Despues di dos aña sin organisa debi n’e pandemia, RCA ta bin bek cu su tradicional Copa Don Elias Mansur. Segun presidente di e Club, Jeffrey Lopez, e aña aki, e torneo lo tuma luga na jui pa e ekipo di RCA por prepara pa Shield Cup na Corsou. E competencia tambe lo sirbi como pretemporada, ofreciendo un plataforma p’e ekiponan di hoofdklas, division honor y division 1, afina nan desempeño.
E partidonan oo cuminsa dia 4 di juli y lo culmina cu e final dia 14 di juli. E encuentronan lo tuma luga 7:00 pm y 9:00 pm durante dos fin di siman. E ekiponan manera RCA, Estrella, Unistars, Roo Afo, River Plate y Caiquetio lo participa.
E torneo tambe lo rindi homenahe na cuater pilar di RCA: Eric Gomes, Carlos Dirksz, Emilia Caster y defunto Jeanine Berg, kendenan lo ta honra durante e evento inaugural caminda lo tin entregamento di plakkaat. E comunidad ta invita pa bin disfruta di un bon futbol y apoya nan ekipo. Bar y cushina lo ta bon surti.
Entrada lo ta 5 florin pa adulto y 2 florin pa mucha y e fondonan recauda lo ta pa yuda fortalece e club y futbol local.
