For di Ministerio Publico a ricibi e informacion cu a detene Eumar Koolman den un investigacion penal. E tabata coordinador di ex-Minister Chris Romero, durante Gabinete Wever-Croes I. Hunto cu e minister y ex-minister Eddie Briesen, ta sospecha nan di a comete actonan castigabel y fraudulento cu plac’i pueblo. Pesey a drenta nan cas, a investiga y awe a yega asina leu cu a detene e sospechoso pa mas investigacion.
Landsrecherche di Aruba, cu ta traha independientemente y bao autoridad di Procurador-General, ta investiga desde 1993 comportacion posiblemente castigabel di ambtenaar y semi-ambtenaarnan. Un parti importante di e tarea aki ta pa bringa corupcion. Corupcion ta ataca un pilar importante di democracia, esta e confianza den gobierno.
Un ciudadano mester por confia cu ta trata cuidadosamente cu placa publico. Un ciudadano mester sa cu ley ta conta pa un y tur y cu corupcion ta inaceptabel.
E investigacion Kwihi ta un investigacion tocante acuerdo di servicio (dienstverleningsovereenkomsten) den e periodo 2017-2021, cera pa un ex-minister Transporte, Communicacion y Sector Primario cu varios persona huridico (rechtspersonen). Ministerio Publico ta sospecha cu diferente persona, entre nan Eumar Koolman, a ricibi placa di Pais Aruba den forma fraudulento via e construccion aki.
E investigacion a cuminsa na februari 2021 cu entrada hudicial na varios adres, durante cual a confisca entre otro, cargadornan di data y administracion.
Investigacion “Kwihi”
Mucho informacion ainda no tin riba e investigacion mes, pero tur cos lo ta draai rond di Dienst Verlening Overeenkomst (DVO) cu Minister Chris Romero a firma pa su mes, pa su conseheronan y nan famia. Claro, na momento cu Ursell Arends a asumi e funcion di minister y a tuma e ministerio over for di Chris Romero, el a bin topa cu poco sorpresa desagradabel.
Como Minister di Integridad, el a scoge pa haci lo corecto, esta di entrega un keho oficial na Ministerio Publico. Ta menciona cu e contractnan aki, por lo menos algun di nan, ta firma na LVV Santa Rosa, pues no ta algo cu e mandatario lo topa cu ne mesora.
A lanta un Uitzendbureau den Cocolishi
Locual Ministerio Publico ta investiga awor, ta e forma con, aparentemente di forma structura, tabata emplea “spook ambtenaren”, cu de facto no ta presenta ni traha, pero cu ta cobra un suma masha halto na salario. Aparentemente Eumar Koolman tabatin un compania cu tabata presta su mes pa emplea e trahadonan aki cu ta “supose” di traha na e ministerio di ex-minister Chris Romero.
Pues, Gabinete Wever-Croes I tabata firma un contract cu e compania di Koolman, cu na su turno tabata emplea e coordinadornan, paga nan impuestonan, etc. y probablemente resta poco ganashi p’e tambe. Pa mas facil, Koolman tabata fungi, den cierto sentido, como un “uitzendbureau” pa varios trahado na e ministerio. Pero e investigacion ta mustra awo cu no ta solamente na e ministerio, sino na LVV Santa Rosa tambe!
E investigacion Kwihi ta continua y no ta descarta detencionnan nobo.
