Awe den conseho di Minister a tuma despedida di polis Andy Young, pa tur e añanan di servicio y dedicacion na pais Aruba, como parti integral di Cuerpo Policial di Aruba. E ultimo aki, pa motibo personal, a dicidi di baha cu VUT, pues prome cu yega edad di pensioen. Pa e ultimo añanan e tabata hefe di polisnan uniforma na San Nicolas y alabes hefe di e seccion di VIP di polis.
Den su carera como el a traha hopi aña cu e VIP team, como tambe cu diferente mandatario. Pa e motibo aki, a invit’e den conseho di Minister, pa asina prome cu e baha cu pensioen, pa despedi di dje.
Durante e momento special aki, hunto cu Minister Presidente, Evelyn Wever-Croes, a entreg’e un plakkaat, pa su profesionalismo y pa su dedicacion durante 39 aña, pa a sirbi su pais.
Andy semper tawata un persona dedica, profesional y hopi positivo, un persona cu no tawata laga nada demotiv’e of desvie, semper un bon ehempel.
