NV ELMAR mes no tin suerte cu nan coriente. Ta parce cu e problema di baymento di coriente ta persigui nan tur caminda, hasta den nan mesun evento, manera cu a sosode den e presentacion di diaranson mainta den un sala na Embassy Suites.
E Conferencia di Prensa cu a encera un presentacion no por a cuminsa na ora pa motibo di un problema di coriente.
Y na momento cu e evento a inicia, na dos ocasion, practicamente tras di otro, fuse a bula den sala di presentacion. Por a compronde cu e sistema di presentacion cu a uza tabata mucho pisa pa e coriente disponibel den e sala. Esaki a causa un retraso di basta rato pa cambia waya y na final a adapta e sistema pa e presentacion por a sigui toch.
Un situacion incomodo sigur pa director di NV ELMAR y Utilities Aruba N.V. Incomodo incluso pa e presentado e mainta aki, kende dado momento hasta a hala atencion di reportero di 24ora.com “mi tin no tin problema pero move for di parti memey, pasobra asina cu e problema soluciona lo bay on di biaha”. E momento ey a pasa 9 minuut desde cu e coriente a bay. Y despues ainda a dura varios minuut prome cu e conferencia por a sigui.
Finalmente for di momento cu e coriente a bay te ora cu a rebooth e sistema pa e conferencia por a sigui tabata mas cu diesun minuut.
