Recientemente Glenbert Croes, Minister di Labor, a anuncia un aumento riba salario minimo pa aña 2024. E anuncio aki ta casi un continuacion di mi columna di december 2022, cu a destaca e aumento salarial premira pa aña 2023. Mi socio Bryan Coffie tambe a cubri e tema aki tambe. E añanan aki di modificacion salarial ta representa un cambio notabel, particularmente na aña 2024, cu un aumento di porcentahe mas substancial.
Aumento di salario minimo: 2023
Desde 1 di januari 2022, salario minimo a conoce un aumento di 1,815.35 florin pa luna pa 1,893.41 florin pa luna, representando un aumento di 4.3%, esaki ta traduci na un aumento di 92.59 florin pa esnan cu ta gana salario minimo.
Aumento di salario minimo: 2024
Cu un bista riba 1 di januari 2024, un otro aumento ta na caminda. E asesor di e minister ta sugeri un aumento di aproximadamente 4.9% riba e salario minimo di aña 2023, cu ta traduci na 1,986.20 florin pa luna.
Impacto riba e pago di over time
Tene na cuenta cu e aumento di salario ta afecta tambe riba e pago di overtime. Mayoria di e trahadonan ya caba ta gana riba e salario minimo, pero e aumento ta eleva e costonan general di e companianan ainda mas, ya cu esaki ta hisa e escala pa e pago di overtime. Siguientemente por mira e impacto, ya cu por determina e escala di overtime door di multiplica salario minimo cu 2.5:
2022: Afl. 1,815.35 x 2.5 = Afl. 4,538.382
2023: Afl. 1,893.41 x 2.5 = Afl. 4,733,53
2024: Afl. 1,986.20 x 2.5 = Afl. 4,965.50
Pa negoshi, specialmente esunnan den e sector di hotel, restaurant, wholesale, benta y e sectornan cu ta brinda servicio, caminda hopi trahado ta gana mas cu salario minimo, esaki sigur lo aumenta e costo di labor debi na un aumento di pago di overtime.
Preocupacion pa escasez di labor y inflacion
Ademas di e ahustacionnan salarial aki, actualmente nos isla ta enfrenta un escasez di trahado den varios sector. E escasez aki y e aumentonan di e costo laboral debi na e aumentonan di salario minimo probablemente lo aumenta e costo general di haci negoshi. Ta posibel cu e companianan lo tin mester di ofrece salario mas halto p’asina atrae y wanta e trahadonan, loke ta genera mas gasto den operacion. E costonan adicional aki ta pasa pa e consumidornan a traves di prijs mas halto. Consecuencia di esaki ta cu e echo aki por contribui na un presion di inflacion den nos economia. E aumento aki ta bin memey di otro aumentonan manera BBO na 2023, aumento di gasolin y utilidad y aumento den costo di shipping.
Conclusion
E aumentonan consecutivo di salario minimo ta refleha gobierno su compromiso pa mehora e bienestar economico di nos forsa laboral. Bien por ta cu e aumentonan aki ta bon noticia pa un grupo (chikito) cu ta gana salario minimo, e negoshinan cu ta conta cu un escala salarial mas halto mester prepara nan mes pa posibel costonan adicional, incluyendo e costonan eleva di overtime. E escasez di trahado ta agrega un capa di complehidad, loke cu por afecta e costonan empresarial y contribui cu inflacion. Compronde y planifica e cambionan aki ta esencial pa mantene un stabilidad financiero y e rivalidad den un mercado laboral y un panorama economico cu ta den evolucion.
