Departamento di Cultura Aruba, Comision Organisado Arte di Palabra Aruba bou auspicio di Ministerio di Cultura Aruba ta organisando e competencia di Arte di Palabra ABC 2018 riba diasabra 14 di maart 2018, cuminsando pa 3’or di atardi na Cas di Cultura.
E hobennan ganado di scol secundario ta competi cu nan poema y storia cortico den nos dushi idioma Papiamento. Tur aña e creatividad y entusiasmo di e hobennan ta creciendo mas y mas. E aña aki ta prome biaha cu e competencia di Arte di Palabra ABC ta tuma luga na Aruba, unda 40 hoben di Aruba, Boneiro y Corsou lo competi cu otro.
Desde 2009, DCA y Comision Arte di Palabra Aruba, ta organisa e competencia di poesia y storia cortico entre e hobennan di Enseñansa Avansa. Na maart ultimo tabata e di 10 edicion di Arte di Palabra Aruba.
Bini diasabra awo na Cas di Cultura pa admira y apoya nos hubentud di nos islanan ruman di Corsou, Boneiro y mas cu claro Aruba den Arte di Palabra su gran final di ABC. Mas di 40 hoben lo t’ey di bishita cerca nos e weekend aki, pa un intercambio den poesia y storia na Papiamento.
Departamento di Cultura Aruba, bou auspicio di Ministerio di Cultura y Comision di Arte di Palabra ta invita henter e pueblo di Aruba, amantenan di poesia y storia cortico, tambe tur scol pa bin apoya nos hubentud durante e atardi aki. Entrada ta gratis, pues bini trempan y disfruta di nos talentonan di islanan ABC.
