Awe, 22 di maart, Aruba a ricibi mas cu seis mil turista. Ta trata di e turistanan cu a bin riba dos crucero, Carnival Horizon y Norwegian Epic. Esaki ta e cantidad mas grandi di turista cu Aruba ricibi desde pandemia.
Awe tur hende ta contento, for di gerencia di Aruba Ports Authority (APA) pa e tour guides, chauffeurnan di taxi y tur cu tin di haber cu turismo crucero. Esaki ta señal tambe cu e parti di crucero ta creciendo pocopoco. Marc Figaroa ta director di APA y durante un entrevista exclusivo cu 24ora.com, el a conta cu un tipo di spin off effect asina tin un impacto importante pa e economia di Aruba. Di otro banda ta nota un caida den cantidad di crucero na nos waf.
Na januari a ricibi cincuentidos calls, na februari trintinuebe calls, na maart cuarentitres calls y pa april binti calls. Figaroa a conta cu esaki ta normal debi cu awo pocopoco ta drentando e low season pa turismo crucero. For di october te cu april ta high season, y di mei te cu september ta e low season. Semper den e lunanan di december y januari ta esunnan mas druk y cu mas crucero.
Relaciona cu e trabounan na waf pa ricibi e crucero Oasis Class, tur cos ta canando bon pa ricibie na luna di mei proximo. Esaki ta prome biaha den historia cu Aruba lo ricibi un crucero asina grandi. Pa e lunanan mas keto nos dilanti, lo ricibi entre shete pa dies crucero pa luna. Compara cu 2019, ta nota un recuperacion di 70% pa 75%. E por tabata mas, pero debi na e variante Omicron na comienso di aña Aruba a perde entre diesseis cu binti mil turista. E cantidad grandi di turista aki ta representa cuater barco na december cu no a yega Aruba y na januari diescinco barco.
