Tabata un weekend basta intensivo tras di lomba pa e coachnan cu ta atendiendo e curso di Dutch Caribbean Coaching Course. Aruba tin cinco coach femenino cu ta participa den e di tres edicion.
Durante fin di siman, e coachnan tabata educa riba e aspecto di structura di wega, ingrediente pa futbol, e cualidadnan di un coach pero primordialmente con pa ta un miho coach no solamente riba aspecto tecnico. Tambe a siña nan riba aspecto di Life Skills y brainstorming riba e proyectonan social cu diferente teoria di programa di World Coach.
Team Aruba a haya oportunidad pa plania, prepara y duna nan prome training hunto na U13 boys di un club local y seleccion U15 boys di Corsou.
Siman aki sigur lo bay engrandece nan conocemento di e materia di coaching un poco mas.
E curso aki ta specificamente pa e coachnan femenino y ta conta cu participacion di Curaçao, Bonaire, Sint Maarten y Surinam. E curso aki ta organisa y financia pa KNVB Worldcoaches cu colaboracion di UEFA y Concacaf.
Tur aña Arubaanse Voetbal Bond ta duna oportunidad pa cinco coach femenino por forma parti di esaki pa asina nos sigui engrandece locual ta ser femenino den futbol.
E coachnan cu ta sigui e curso ta Jessica Rivero di A.S.V. Riverplate, Rigini Robert di Academia Damas U-14, Aryenne Lacle di S.V. Dakota, Tayrina Arrindel di S.V. Brazil Jrs. y Jessy van der Linde di S.V. San Luis.
Woman’s Football & FIFA Forward Programme Coordinator di AVB, Dyane Wiersma, a biaha cu nan y e ta haci un presentacion tocante desaroyo y plan nan di futuro pa locual ta futbol femenino.
