Siman pasa e ministernan di husticia di Reino Hulandes a tene nan consulta regular. Sinembargo di loke a publica, no por a lesa cu a atende e puntonan treci dilanti den un rapport hopi preocupante di e Comision Europeo pa Tortura y Maltrato (CPT). Durante e bishita aña pasa, e comision a bishita tanto e wardanan di polis, centro di detencion di migracion como tambe prizon di Aruba. E comision a traha un relato unda ta menciona kico a cambia desde nan ultimo bishita na aña 2014 y kico no a cambia y cu mester traha riba nan.
Aunke cu e comision aki ta duna solamente recomendacion, nan implementacion ta deseabel pa e imagen di Aruba den exterior pa loke ta e derechonan humano. Un di e puntonan di preocupacion di e comision ora cu nan a bishita KIA ta cu ainda tin hopi puesto vacante y cu esaki tin su efecto riba e operacion di e instituto. Si no yena e puestonan aki, cu ta den man di gobierno, nunca lo por maneha e instituto di un forma adecuado (humano y cumpliendo cu derecho di e presonan y nan rehabilitacion pa por drenta comunidad bek).
Nan tabata determinante den nan expresion “no a mira ningun mehoracion pa loke ta nivel di e staf di KIA desde e ultimo bishita na aña 2014. E situacion di staf ta keda inadecua pa un bon funcionamento di e establecimento”. E comision a realisa e bishita aki memey di aña 2022.
Nan ta haci e critica ariba menciona pasobra a constata cu di e 147 postnan (teoretico) di siguridad, 72 di e postnan aki ta vacante. Pero mas tristo ainda, di e otro 75 oficialnan cu e instituto tin, ocho di e funcionarionan aki ta riba un AO di largo plaso of ta haciendo otro tipo di trabou.
Tambe a duna e ehempel cu un shift di dia mester tin 29 funcionario. Na momento di e control, 10 di e funcionarionan ta nobo y ainda tabata den nan fase di entrenamento inicial pa cual nan mester traha bou supervision di un funcionario mas halto. E shift di anochi ta consisti di 12 funcionario. Loke cu semper nan menciona y cu ta un problema serio den aparato gubernamental ta cu e frecuente absentismo di un dia (meldziek) y otronan di largo plaso (tin biaha pa 10 aña) ta keda un reto hopi serio. Segun calculo, ta normal cu e staf mester opera cualkier dia cu un 8% menos di personal necesario.
E echo cu e staff ta limita den e cantidad necesario ta haci cu nan trabou ta limita na esey, guardia cu ningun otro responsabilidad cu no ta esun di siguridad. E funcionarionan di KIA, nan a bisa, por hunga un rol mas amplio pa interactua den un forma positivo cu e presonan, participando den e programanan di rehabilitacion y ta un elemento integral den e acercamento multidisciplinario den bienestar general di e presonan. E ta haci e trabou di e funcionarionan uno mas interesante y ta atende cu e aspecto di resocialisacion di e preso..”cu ta un aspecto moribundo te awo”, e comision a bisa.
Prome mester cuminsa pa incorpora mas personal den e staf y desaroya e capacidad y rol di e oficialnan di prizon y tambe atende cu e problema di absentismo.
E staf specialisa cu mester provee actividad y apoyo na e presonan, tambe ta laga di desea. A constata cu tin solamente dos trahado social, un instructor vocacional, cuater funcionario pa workshop y dos lider di actividad. E siguiente puestonan tabata vacante: cinco docente, consultant / coordinador di educacion, tres puesto di instructor di entrenamento vocacional, dos puesto den workshop, un di trahado social, tres puesto di asistente di trahado social y un puesto di lider di actividad. Mester yena e puestonan aki lihe, cu ta necesario pa ehecuta e otro recomendacionnan den KIA.
