E comerciante Chines, X. Zhao di 58 aña di edad, di Winter Garden Supermarket na Savaneta cu a resisti su detencion algun siman pasa, entretanto a recobra su libertad caba. E sospechoso, probablemente bou influencia, a bay te Club Chines durante un reunion di directiva. E mes no ta forma parti di e reunion of directiva. El a bay dicidido pa purba agredi of mata e presidente di e club, esta e comerciante William Cheng, doño di Cheng’s Supermarket na Bubali.
Tur loke a sosode ta graba cu camera di siguridad for di momento cu e sospechoso a yega te ora cu el a bandona e sitio. Chinesnan durante reunion a reacciona mesora ora cu a manda e chapi pa mata e presidente, dia 30 di juni ultimo.
Casi un siman despues a detene e sospechoso pa intento di asesinato. Na wowo di hangua e presidente di Club Chines, William Cheng, a scapa. A delibera hopi prome cu entrega keho contra su compatriota, pero a realisa cu casi e por a muri si acaso e chapi a alcans’e. Tambe a tene na cuenta cu por tin rivalidad comercial den e asunto aki, di un supermercado pa e otro, pa cual su competencia a purba “schakel” e “uit” di e forma cruel aki!
Mientrastanto ora cu tur hende a kere cu pa Ministerio Publico y tambe hues-comisario, e asunto aki ta algo serio, tur hende a pensa robes. Pa fiscal y hues-comisario loke e sospechoso a haci y a prepara den su mente pa sali di su cas cu chapi pa bay te Club Chines pa mata, ta algo cu no tin un peso asina pisa pa tene cera. El a sinta su prome dianan na ward’i polis, djey a bay KIA y algun dia despues ya caba a dicidi di lag’e bay. E mester keda pendiente si pa dia su caso bin dilanti.
Loke hopi biaha sa pasa ta cu un hende asina, ora lag’e bay liber prome cu su caso, dificilmente e ta haya mas castigo di prison. Di otro banda el a trece un sabor amargo cerca hopi hende cu no ta caba di compronde e maneho di husticia den un caso asina. E acto aki ta condenabel y awor pa tende cu ya caba a lage sali di prizon, ta fomenta hopi duda den husticia. Hopi mas duda den fiscal di Ministerio Publico y den maneho y decision di hues-comisario.
