Ta for di 2022 cu e lista di tarifa cu e taxistanan ta uza a vence, y durante un conferencia di prensa di gobierno a puntra e minister si e tin proposicion riba mesa pa cu e lista di prijs nobo. Segun Ursell Arends, Minister di Transporte, su maneho ta pa cumpli cu ley y ningun caminda den ley tin poni cu minister tin cu atende cu lista di prijs pa taxi. Ley ta papia mas bien di un taxi-meter pa e cobransa.
Na e momentonan aki su ministerio y diferente organisacion y departamento ta trahando riba un aplicacion p’asina e cobransa ta mas visibil y tin claridad. Apart di esey, ta trahando riba henter un maneho nobo. Pues si mir’e bon, e lista di prijs cu ta uzando actualmente ta ilegal, mirando cu no tin para ningun caminda den ley un lista di prijs. Arends a sigura cu tin cu revisa henter e ley pa cu transporte riba nos isla. Locual ta aplicando ta un tipo di gedoogbeleid cu gobernantenan prome cu ne a introduci, pero e no ta algo cu ta cuadra segun ley.
