Comite Olimpico Arubano (COA) a reuni cu formado di Gabinete Wever-Croes II unda cu nan a trece dilanti diferente punto relaciona cu deporte. COA no ta mira loke a pasa, pero tin bista pa futuro. A duna un carta riba e puntonan importante di deporte cu nan ta kere cu formador y minister tene cuenta cu ne.
Secretario general di COA, Nicole Hoevertsz a informa cu pa nan tabata un honor di a haya invitacion pa reuni cu formado. Durante nan combersacion, el a informa cu esaki tabata prome bes cu nan a haya invitacion pa un reunion. Mientras nan a reuni e organisacion no a repasa loke a pasa e añanan anterior ni kico tabata e efecto cu Covid-19, e pandemia, tabata tin riba deporte.
COA kier mira padilanti, mira kico nan kier haci y kico ta desea di haci hunto cu gobierno. Hoevertsz a expresa cu na luga di mira patras cu no a bay bon, pero nan ta mira futuro y kico tur por haci pa mehora deporte. Na final a entrega formado un copia di carta cu resumen di tur punto cu nan ta kere ta bon pa formador tene cuenta cu ne. E organisacion ta spera cu pronto ta conduci na nombracion di minister nobo di deporte. Asina aki p’e gobierno aki duna mas reconocemento y balor na deporte.
Hoevertsz a bisa cu deporte ta hopi mas importante cu loke Aruba ta dunando aworaki. Si duna mas atencion y balor na deporte, lo tin un comunidad mas sano, mas inclusivo, mas respetuoso pa hende homber y muhe, etc. Pa COA deporte no ta un meta final, pero e ta un medio pa logra cos grandi p’e pais.
Pa cobertura mas amplio, lesa e proximo edicion di TREMPAN.
