Organizadornan di Art Fair dos dia largo a abusa di clientenan di Movies The Principal. Nan a cera e area di tal forma cu esnan cu kier bay wak cine no por pasa. Pa nan yega pa mira Cine na Movies The Principal, nan mester paga 15 florin di entrada di Art Fair. Esey a causa cu esnan cu ta bin cu famia no ta bay paga tres of cuater ticket di 15 florin y riba dje paga pa mira e cine tambe. Ta considera esaki mas bien un abuso cometi pa esnan di Art Fair lidera pa Tito Bolivar.
Ora nos a tende esaki di clientenan, mesora a busca contacto cu esnan encarga cu e maneho di Movies The Principal. Nan a confirma esaki tambe. Hasta trahador di Movies The Principal a paga 15 florin di entrada di Art Fair pa asina nan por a yega trabou. A purba di splica e hendenan di Art Fair pero dos dia largo nan a cobra. Awor ta analisando pa mira kico nan lo bay haci diadomingo durante e actividad. Ta un abuso esaki ta contra esnan cu no ta interesa den Art Fair y kier bay solamente wak cine. Nan a cera e area cu heki y ta cobra esnan cu kier bay disfruta di algo otro den e area cera.
Ademas di esey riba tereno di otro hende ta pone wc publico pa esnan cu bin Art Fair. E organizador mester sa cu ora e ta haci un actividad mester tene cuenta cu otronan tambe. No por coy tereno di hende y pone baño cu bari. No por cera un area cu heki y perhudica otro negoshi. Esey ta conta pa Tito Bolivar cu mester sa mihor ora cu e ta organizando e evento pa algun aña caba. Manera semper e lo sali purba hustifica pa tira culpa riba otro. Pero e mester por sa cu ora bo ta organiza algo y kier cera e zona mester analisa kioc tin rond. Ni maske bo por tin permiso of laga, no por stroba acceso pa esnan cu no kier bay Art Fair pero si kier yega na otro negoshi manera esun di Movies The Principal.
