Otro siman nos ta celebra e Fiesta di San Juan – Dera Gay. Relaciona cu esaki e siman aki Departamento di Cultura a organisa presentacionnan escolar na Cas di Cultura y esaki lo continua otro siman.
Departamento di Cultura a bishita varios scol y a entrega e “Caha Sabi”. Departamento di Cultura a prepara e caha aki specialmente p’e scolnan pa asina nan por celebra e fiesta di San Juan. E caha ta contene un calbas, e paña uza pa tapa wowo y e palo cu ta baila cu ne. Ademas tin informacion di historia di celebracion di San Juan, e buki di Wantomba y Fiesta di Dia di San Juan – Dera Gay.
E scol ta ricibi tambe un usb cu diferente cancion y video di San Juan. Esaki ta pa e scolnan por tin e materialnan educativo y informativo pa asina e docentenan por uza esaki den nan les pa nos muchanan cera conoci cu e fiesta di San Juan – Dera Gay y asina conoce mas di nos cultura y nos fiestanan tradicional.
