Sunju Ramchamdami a tuma contacto cu 24ora.com pa trece dilanti un disgusto cu el a experiencia recientemente cu personal di siguridad y parkeo na aeropuerto. T’asina cu ora el a bay hiba su casa, el a haya e parkeerplaats blokia pa e personal di AAA N.V. pasobra e tabata yen y mas auto no por a drenta. E ora ey el a puntra un siguridad unda e mester staciona y esaki a bis’e pa bay para leu y lastra e maleta bin.
Door cu awa tabata fingui y su señora ta sufri di lomba, el a para dilanti di e edificio di Departures pa laga su casa baha y baha e maleta di biaha. Ramchamdami ta conta cu den menos di cinco minuut el a bin bek na su auto pa haya e mesun siguridad ta tow esaki. A pesar di cu el a purba di splica e siguridad di e situacion, esaki a bis’e cu e tin cu paga boet. “Esey ta abuso di aeropuerto,” el a bisa.
El a pidi pa papia cu e manager, mientras cu a tow su auto bay cu ne. El a bay na e sede di siguridad compaña pa e agente Jonathan, kende a haci comentario desagradabel na un otro trahado. Ramchamdami ta kere cu mester siña con pa trata hende na aeropuerto y un hende mester splica na e trahado ey.
E ciudadano ta indica cu e no ta compronde na unda precies e siguridad tabata kier men pa para leu. P’esey el a opta pa baha e maleta y despues bay busca un luga pa staciona. “Nan a pone mi paga e boet. Mi a pidi e nomber di e manager y el a gewoon cana bay,” asina Ramchamdami a bisa. E boet ta di 75 florin.“No ta husto,” e a bisa, argumentando cu e manager mester a compronde cu awa tabata fingui. E ciudadano a sigura cu nunca a yega di pasa den esaki prome. Semper e ta para na parkinglot, bay pag’e y despues sali. Sin embargo, e parkinglot tabata yen te cu e auto di aeropuerto tabata para na entrada di parkinglot. Y asina mes cu a papia cu e siguridad, esaki ta tow su auto. E ta haya cu esey ta abuso.
