Uni pa pone fin na violencia contra hende muhe en general. Esaki ta meta di e campaña di e NGO-nan cu ta lucha contra violencia y derechonan di hende muhe. Ta tristo pa mira cu aki na Aruba parce cu no ta importante e tematica importante aki, si mira e asistencia na e caminata di diasabra ultimo.
E campaña a haci un yamada na ciudadanonan y gobierno(nan) di mundo pa mustra con hopi nan ta preocupa pa pone un fin na violencia contra hende muhe y mucha muhe. E meta ta pa haci tur esfuerso pa preveni esaki y cual ta un paso direccion di un mundo mas sigur, mas igual y prospero.
![](https://24ora.com/wp-content/uploads/2023/11/CK9A0250-1920x1280.jpg)
Diasabra tabata e inicio di e 16 dianan di activismo den e direccion aki. Un evento pa cual cinco NGO (fundacionnan local) a uni pa expresa nan solidaridad. Anteriormente via di un conferencia di prensa a informa di e actividad aki cu ta un caminata cu ta sali for di corte diasabra atardi 6:00 pm direccion di sede di gobierno pa haci entrega di un documento.
Mientras cu e grupo di personal aki ta marcha pa derecho di hende muhe, caya ta yega cu centenares di hende haciendo compras of disfrutando di e ceremonia di cendemento di luz den caya.
![](https://24ora.com/wp-content/uploads/2023/11/CK9A0278-1920x1280.jpg)
Den e caso aki mester un aplauso na esnan cu a marcha, adulto y algun hoben cu a cera rond di 50 persona. Pero ta tristo pa bisa cu Aruba tin mas o menos 110 mil habitante. Esaki ta nifica cu menos cu mita porciento (rond 0,045) a mustra nan solidarismo cu e tema aki.
Practicamente tur dia polis mester bay un asistencia relaciona cu actonan di violencia. Y e resultado di participacion den e marcha sigur ta un dolor grandi pa tur esunnan cu ta sali na defende di hende muhe.
![](https://24ora.com/wp-content/uploads/2023/11/CK9A0196-1920x1280.jpg)
MARCHA
A combersa cu Juliene Duran di Hias Aruba (organisacion cu ta traha na fabor di derecho humano). El a splica cu esaki ta un campaña cu nan ta tene na Aruba pa cuater aña caba. Hias Aruba a uni cu UNHCR (United Nations High Commissioner for Refugees), Fundacion Contra Violencia Relacional (FCVR), Soroptimist Internacional y Centro pa Desaroyo di Hende Muhe (CEDEHM).
E intencion ta pa durante 16 dia conscientisa e ciudadanonan y pueblo en general riba e problema existente na Aruba y rond mundo riba violencia contra hende muhe. “Nos ta spera cu e tipo di actividad aki nos yega na tur hende den comunidad.”
![](https://24ora.com/wp-content/uploads/2023/11/CK9A0241-1920x1280.jpg)
Aunke cu e enfoke ta riba hende muhe, no ta laga atras e maltrato riba hende homber y mucha homber. Y e vision ta pa concentra den prevencion di violencia, Nan ta di pensamento cu via di actividad manera e marcha y otro actividadnan contribui na prevencion di violencia. “Prome cu nos yega na un cambio, mester sensibilisa y conscientisa e pueblo riba cual ta e consecuencianan di violencia, con pa traha pa mitiga e riesgonan.”
El a haci un apelacion na pueblo pa sigui nan riba rednan social pero mas cu tur cos participa den e actividadnan cu ta finalisa riba 10 di december cu ta e fecha di conmemora Dia Internacional di Derecho Humano. “E ta un periodo pa tur hende conscientisa riba e problema existente,” Duran a bisa.
![](https://24ora.com/wp-content/uploads/2023/11/CK9A0229-1920x1280.jpg)
Na final di e caminata di 2 km den cual ademas di e adultonan, a participa 4 mucha y hoben, a haci entrega di un manifiesto na minister Rocc Tjon, encarga cu e cartera di Husticia.