Diahuebs anochi a organisa e di 50 Festival di Dande di categoria adulto. Na final di anochi Maryjane Vrolijk a bira reina di dande, mientras Jason Kelly a bira rey di rey di dande.
Harry Croes, organisado di Festival di Dande, a splica cu e festival a bay bon y e tabata sumamente contento cu e resultado. Na ultimo momento nan mester a haci algun cambio pa motibo cu tabatin situacion di cual tabatin hopi cantante.
Nan mester a check entre otro nan edad, esunnan cu a cay den categoria di pasado cu a gana y ta bin den e parti di rey di rey y reina di reina. Pa loke tabata e festival, esaki tabata cinco hinca den uno. Tabatin e parti di composicion propio, tipico, rey y reina.
Un parti importante ta trece folklore bek den pueblo. Pueblo tin di bay duna sosten na folklore Arubiano, esta dande. Croes a indica cu dande ta data na 400 pa 500 aña bieu y a bin ta rebib’e. Ta trece e parti importante dilanti cu ta uni tur e musiconan pa loke ta trata e parti di ban un y yuda otro. E tabata contento y satisfecho cu e resultado dje anochi.
Croes a mira e union di e musiconan, dje cantantenan prome durante y despues dje festival, pero tambe durante entregamento di premio.
Maryjane Vrolijk, reina di dande 2022, a splica cu e tabata sumamente contento y pio cu su grupo tabata un sosten grandi pa su persona. Pa por a prepara p’e festival aki, a tene hopi training cu e grupo y training general. Incluso e tabata train na cas cu su mayornan y tur cos a bay bon. Den su dande el a percura pa trece su mensahe yega na cada persona y e ta sinti cu e por a expresa su mes manera e tabata kier.
Desde chikito Vrolijk ta competi den competencia cultural y e ta hopi contento di por a sigui competi den grandi. Un conseho cu e tin p’e hobennan ta pa kere den nan mes. Si ta algo cu e hoben gusta pa e bay p’e y no tene miedo. E ta bay bon y si ta su pasion p’e hacie.
Jason Kelly, rey di rey 2022, a indica di tabata contento cu e resultado, presentacion y e publico cu a presencia e Festival di Dande. Pa bay cu e titulo el a traha p’e. Kelly su mensahe tabata cu despues di tur tempo di a pasa den duro awo t’ey bek y mester sali padilanti como un Aruba uni. Esey tabata loke e kier a trece cu su dande.
Kelly a conta cu pa dos siman nan a train cu e banda completo. El a sigui splica cu e banda a compaña varios mucha. Den e dande di mucha, segun Kelly, nan tabatin shete mucha. E tabata hopi trabou, pero ora ta dedica bo ta haya e resultado di loke a dedica na dje.
Di por a presenta dande bek pa publico, el a indica cu e sentimentonan tabata unico. Na aña 2020 el a sali rey di dande y esaki tabata haci virtual. E tabata completamente diferente, pasobra e studio tabata bashi sin hende, pero compara cu tabatin hende el a hay’e uno tremendo.
