Tabata diabierna, 14 di juni ultimo cu Christian d’Abreu Ribeiro a sali for di su cas pa bay cumpra algo na supermercado, pero di e dia ey su famianan no sa mas di dje.
Su wela, Maria Geerman, ta hopi preocupa ya cu ta casi un siman caba y te ainda e no sa nada di su nieto. E ta pidi pueblo di Aruba, pa yud’e busca su nieto. Hunto cu algun famia, nan a bay cana cant’i lama, band’i Faro, buscando pa sa si nan ta haya Christian. Geerman tabata desconsola, pasobra cu e ta wak e dianan ta pasa bay y te ainda nada. Diadomingo el a notifica autoridadnan concerni cu a manda e alerta pa tur e postnan policial, pa si acaso nan haya notificacion. El a hasta public’e riba Facebook, cu ful e descripcion y potret di Christian, pa si acaso un hende por a mir’e. Wela di Christian, Maria a sigui conta cu Christian tin un shete marca riba su man, door cu su mama a fayece cuater aña pasa y su wela a tambe a fayece un aña pasa. Polis tin telefon di Christian, pa asina averigua ken ta e amigonan di Christian.
Omaira Lares, familiar di Christian, hunto cu demas famia, for di weekend pasa ta buscando Christian, cu manera bisa anteriormente, a Sali for di cas pa bay supermercado y te dia di awe, e no a bolbe cas mas. Lares a conta cu nan ta bin di un famia humilde, pa cual nan ta haci peticion na e pueblo di Aruba, pa si nan wak Christian un caminda pa por fabor tuma contacto cu nan. Diasabra nan a bin haya e auto di Christian cant’i lama y a bin haya su yab’i auto colga na un palapa. Tambe a bin haya un slof di dje. Pero di Christian mes, nada te ainda. Famia ta keda cu e speransa cu e lo por ta scondi cerca cualkier amistad di dje.
Desde fayecimento di su mama y di su wela, Christian a cay den depresion. Morto di dos di su sernan keri a dale masha duro mes y tabatin dificultad pa supera esaki.
Ta pidi cualkier persona cu por sa unda Christian ta, si e ta scondi un caminda, pa por fabor, tuma contacto cu un di su familiarnan, cu ta desespera cu nan no sa nada di dje ainda.
Cualkier persona cu tin informacion di e paradero di Christian, por fabor tuma contacto na numbernan di telefon: 5944678, 5878501 y 5940524
