Chris James ta e candidato nobo di AVP cu a lansa diasabra ultimo durante un ceremonia cu a tuma luga den su bario y rondona pa su hendenan.
“Esaki ta un dia importante pa mi lansando mi mes como candidato di partido AVP. Mas orguyoso pasobra mi ta representando mi dushi districto di San Nicolas. Nos ta sali fuerte.”
El a conta cu recientemente a cana den e casnan den e districto aki unda cu a scucha e habitantenan, scucha kico ta nan preocupacionnan y kico nan kier mira soluciona. El a papia no solamente di cambio pero alivio pa henter e pais. “Nos mester sigura cu tur hende por biba di un forma saludabel, bon y tin placa pa cubri nan necesidadnan.”
E ta kere cu mester stop di punta dede y pone solucionnan riba mesa, scuchando e hendenan. Esey ta un eror cu hopi politico ta haci, door di no scucha hendenan.
E motibo cu el a uni su mes na AVP ta pasobra e ta un partido cu el a bin ta siguiendo e ultimo añanan. E tin un lider cu e ta admira, cu ta manera capitan di un barco cu e ta guia. Den e partido tin union y ta sinti cu nan ta papia di solucionnan.
Den pasado tambe el a campaña cu y pa Mike de Meza di San Nicolas y “awo mi ta feliz di ta hunto cu nan pa traha pa Aruba y San Nicolas ta hopi mas miho. Y mester percura cu tin prespuesto pa San Nicolas tambe.
