Ariba 20 di November mundo henter a celebra e dia di Derecho di Mucha. Ariba 20 di November 1989 Nacionnan Uni a adopta e tratado di Derecho di Mucha. Y ariba 20 di november 1999 tabata e dia cu prome biaha un mucha a tuma contacto via e number di telefon 131 cu Telefon pa Hubentud. Den cuadro di esaki Fundacion Telefon pa Hubentud Aruba a celebra dia nacional y Internacional di Derecho di Mucha y su bintidos aniversario.
Pa bintidos aña caba Fundacion Telefon pa Hubentud Aruba ta presenta ariba e dia aki un proyecto pa e aña binidero. E aña aki no tabata otro. Un otro proyecto cu Fundacion Telefon pa Hubentud Aruba a presenta ta Chic Chat. Den cuadro di cooperacion Fundacion Telefon pa Hubentud Aruba a acerca Centro di Desaroyo di Hende Muher pa ta parti di e proyecto aki.
Hunto cu otro telefon pa mucha y hoben Internacional nos ta mira cu e hende muhenan ta esunnan cu mas hopi ta tuma contacto cu pregunta, of pa ayudo y conseho. Entre 14 pa 17 aña bo ta haya e retonan. Basa riba e decicionnan cu bo ta tuma, bo lo por ta feliz y liber. Door di bon informacion tocante e temanan cu actualmente ta un reto pa e hobennan, e hobennan por tuma miho decicion den bida. A desaroya Chic Chat pa informa e hende muhenan hoben cu informacion corecto.
Seis hende muhe hoben entre 14 y 17 aña a participa na Chic Chat. Algun tema cu a trata durante Chic Chat tabata por ehempel: relacion, date, droga, amor propio, media social, relacion cu mayor etc. A graba Chic Chat y lo bay transmiti esaki via media y media social pa preventivamente trata di reduci desaroyonan negativo bou nos hende muhenan hoben.
Otro organisacionan cu a participa na Chic Chat cu nan experticio ta Famia Planea y FADA. Na momento cu e hende muhenan participando na Chic Chat tabatin pregunta tocante droga/ adiccion of sexualidad, e profesional representando e organisacion a suministra informacion corecto tocante e tema.
Pa mas informacion tocante Chic Chat por tuma contacto cu Fundacion Telefon pa Hubentud Aruba via nan website: 131.aw, Instagram: 131aruba, facebook: https://www.facebook.com/telefon.hubentud/, email: [email protected] of telefon 5886138/ 5884011.
