E fin di siman aki, Aruba Marriott Resort hunto cu e chef strea di Michelin Star, François Geurds, directamente for di Hulanda lo presenta evento extraordinario durante tres anochi, cuminsando for di diabierna.
Tres anochi di sabornan impecable, incluyendo un cena di seis plato y wine pairing como tambe un “Aruban Classics Revisited” den colaboracion cu cinco chef local di renombre.
Durante e periodo cu François ta aki, el a brinda guia na un grupo di seis studiante di EPI y a brinda e oportunidad na dos hoben pa core stage na un di e famoso restaurantnan cu tin Michelin Star.
Durante tres dia lo tene e evento aki na Atardi na Marriott.
Huespednan cada bes ta mas en busca di experencianan culinario y “nos ta contento di e relacion cu Francois, kende ta bini di Aruba cu un mama procedente di San Nicolas”, segun Raoul Lemmerling, Complex General Manager di Marriott Resort.
François ta bishita Aruba tur aña y Marriott ta hopi contento cu momento cu a acerc’e pa bin presenta su trabou na e prestigioso hotel Marriott, el a acepta e invitacion mesora.
Ta organisa tipo di eventonan asina pa motibo cu “nos kier pa e huespednan mira Marriott como un destinacion culinario y a haci esaki den pasado caba. E eventonan cu nos a planea ta un cena bou di e shelo cu strea. No solamente ta mira e bahada di solo pero ta mira e claridad di luna mientras cu ta disfruta di e delicianan presenta pa chef François.” Esey ta diabierna anochi.
Diasabra y diadomingo a invita chefnan local, kendenan ta sumamente talentoso. Ta papia aki di entre otro e chef di Marriott y di otro restaurantnan local. Esaki ta tuma luga di un forma informal den lobby di Marriott. Aki por cana rond y purba diferente tipo di cuminda crioyo.
François Geurds ta traha na Hulanda, y ta propietario di dos restaurant cu Michelin Star. Nan mes ta produci tur nan productonan den cas, incluso e pan, cuminsando mainta tempran te ora e restaurant habri anochi. Tin un staff di cincuenta persona ta traha pa produci producto di calidad cu a haci nan merecedor di Michelin Star. “Nos meta ta pa e huespednan haya un bunita experiencia.”
François a traha tambe na Belgica, Italia, y New York, pa menciona algun.
Su meta ta pa awo subi nivel di chefnan local y traha hunto lo logra esaki, esta por medio di entrenamentonan cu e mes ta provee. E entrenamento ta den henter e proceso di produccion te cu e presentacion na e cliente.
Presenta den e conferencia di prensa tabata Diantha Boekhouwer, Brand Niche Manager na ATA, y ta contento di por a participa den e plan di Marriott pa presenta na huespednan e experencia unico di loke chef François ta brinda. Mas pa motibo cu e tin descendencia Arubiano.
Turismo culinario ta un atraccion nobo cu ta concentra riba dje y ta algo cu huespednan ta busca durante nan bishita na paisnan cu nan bishita. E ta trece un balor economico grandi pa Aruba y ta brinda e oportunidad pa mustra e talentonan local riba tereno culinario. “Esaki ta importante pa ATA sigui promove Aruba como un destino unico, y tambe riba tereno culinario.”
E instituto di educacion EPI, Ankie Danker, no por a caba di expresa su gratitud cu e miho studiantenan di e instituto por participa den un evento asina. E ta un oportunidad y experiencia unico. Semper ta importante pa studiante por haya e experiencia, mas ainda for di un chef asina reconoci manera François.
Un di e participantenan den e proyecto ta Urvin Croes, kende hunto cu e demas chefnan y studiantenan ta haya un experiencia inolvidabel.
