Diasabra anochi Centro Man na Obra a tene nan celebracion di Halloween. Tur aña den luna di october e scol semper tin un siman completamente di actividad. E ta algo cu ta sosode anual, pero debi na e pandemia COVID-19 nan no por a organis’e manera semper.
Elvira Tromp, cabesante di Centro Man na Obra di departamento di adulto di Fundacion Pa esnan cu deficiencia intelectual, a splica cu nan a pensa di haci algo leuk pa un parti di clientenan. Centro Man na Obra ta consisti di 75 cliente, pero door di e reglanan di higiena, distanciamento, nan no por a invita tur cliente. A organisa un parti di actividad pa nan y e team hunto cu clientenan mes a prepara tur cos. E clientenan a uza nan creatividad, verf, corta y plak. Nan a pensa cu e tabata algo chikito, pero esaki a crece y bira grandi. Segun Tromp, e clientenan a disfruta di esaki.
Tabatin cinco stent p’esey cada dos lider di grupo mester a scoge un tema y decora esaki. Den cada stent tin un wega cu cada cliente mester haci. E tabata algo interactivo y pa nan haci algo, pasobra nan no mester a simplemente pasa mira e stent, pero haci algo special. Nan a haya algo leuk pa tin huradonan y husga cua stent tabata mas creativo.
Cada grupo a scoge e tema cu ta pas pa Halloween y tambe a bin cu un spookhuis. Segun Tromp, pa algun di e clientenan pa prome biaha nan ta drenta un spookhuis. Nan mes no sa kico tabatin di spera. E cabesante ta gradici na e team cu a traha dia y nochi pa por keda cla. Tambe na algun instancia cu a yuda cu e donacionnan cu nan tabata mester, Lions Club cu a duna nan un man y a trece treat p’e clientenan.
