Centro di Experticio Cuido di Educacion Saba ta un di e ganadonan di Appeltjes van Oranje 2021. A anuncia esey durante entrega di e premionan di Oranje Fonds na Palacio Noordeinde na Hulanda. Tambe Ixta Noa di Arnhem y e “Zelfregiecentra van Vriendendiensten” na Deventer a cay den e premionan. E ganadonan, cu ta dedica nan mes na cuido di esunnan cu limitacion mental, a ricibi e premionan for di man di Reina Máxima.
Appeltjes van Oranje ta entrega tur aña pa Oranje Fonds na proyectonan social cu ta percura pa den nos comunidad ningun hende keda bandona. E tema di e aña aki ta Forsa Mental. Esey ta nifica cu e premionan e aña aki ta bay na proyectonan cu compromiso di boluntarionan ta percura cu esunnan cu limitacion mental por participa di forma digno den sociedad. A nomina diesdos proyecto, bou cual tambe Fundacion Equine Corsou. Di cada proyecto tabatin un representante den sala. Debi na e medidanan di corona, un cantidad limita di persona so por tabata presente na e ceremonia di entrega. Tambe por a sigui e evento via livestream. Esaki por mira riba oranjefonds.nl.
Ganadonan
E proyecto Ways of Wellbeing di Centro di Experticio Cuido di Educacion Saba ta ofrece sosten na mucha cu limitacion y na nan mayornan. E muchanan aki a topa cu mas dificultad ainda e ultimo añanan door di horcan Irma cu a asota e isla na 2017 y e crisis di corona cu a isola e isla completo di mundo.
Ixta Noa ta gana e premio Grote Appeltje van Oranje. E premio aki ta bay na e proyecto aki pa e manera excepcional cu nan ta sigui desaroya y renoba nan mes. Cerca Ixta Noa hendenan cu sintomanan di enfermedad mental ta sosteni pa expertonan. E ‘Zelfregiecentra van Vriendendiensten’ (Centronan di Autoservicio pa Amigo) ta percura pa hendenan cu problemanan mental por bolbe participa den comunidad. Nan ta organisa un cantidad di actividad unda hende ta drenta den contacto cu otro, entre otro tambe cu esunnan di igual limitacion.
Oranje Fonds
Oranje Fonds ta construi na un comunidad social, unda hende t’ey pa otro y unda tur hende por participa. P’esey nan ta mobilisa, reforsa y sostene mas tanto hende posibel y e organisacionnan ta percura cu niun hende ta keda para su so. E sosten ta consisti di conocemento, red, placa, tempo y reconocimento. E Fondo por haci esaki danki na e.o. e Nationale Postcode Loterij, Nederlandse Loterij, Vrienden en Bedrijven. Rey Willem-Alexander y Reina Máxima ta pareha protector di Oranje Fonds.
Foto
©Oranje Fonds – Stefan van der Kamp
