A combersa cu Ray-anne Hernandez cu ta presidente di Centro di Bario Tanki Leendert tocante e celebracion di “Dera Gay” cu a tuma luga 24 di juni riba dia di San Juan, cual ta e fecha cu ta organisa e celebracion di “Dera Gay” rond di nos isla.
E presidente ta mustra cu e fiesta organisa ta un stimulacion pa mantene nos cultura bibo entre e adultonan y hobennan. Un celebracion cu tawata tin varios parti interesante manera: “competencia di grito di gay y galiña” cu tanto mucha y adultonan por a participa, competencia di trahenan tipico, Ademas tawata tin baile di bandera y e baile di “Dera Gay.”
Hernandez a mustra cu e asociacion di musiconan tipico Rubiano ta purba tur luna pa reconoce dos baluarte den diferente districto y bario nan Aruba, pa e luna aki a toca turno na e bario di Tanki Leendert .
E asociacion di musiconan a acerca e directiva di Centro di Bario Tanki Leendert pa scoge dos persona cu a duna aporte na cultura y musica pa e bario. Despues di deliberacion a bin scoge dos candidato cu a duna un aporte valioso na e bario.
E prome candidato ta Oslin Ismael, kende ta e persona cu a yuda funda “Scol di Musica Tanki Leendert” den principio di aña 2000. Tambe Ismael a duna su aporte pa stimula muchanan pa por participa den festivalnan di Himno y Bandera como festival di Dande. Ademas e habitante ehemplar a participa como compositor, cantante y musico durante e festivalnan pa hopi aña.
Di dos persona cu a nomina ta e conocido figura farandulero John Francis Jacobs cu desde su infancia na edad di 5 aña a cuminsa cu su carera y conoci pa hopi aña como cantante, musico y presentado di media. Jacobs tin actualmente tin 55 aña activo den e mundo farandulero.
