Dia 12 di mei, Organisacion Mundial di Salud (WHO) ta conmemora Dia Internacional di Enfermeria rond mundo, cu e obhetivo di rindi e merecido homenahe na tur e enfermeronan cu ta realisa e labor esencial aki pa humanidad. Tur aña ta selecciona un tema central p’e celebracion aki. Na 2024, e tema di Dia Internacional di Enfermeria ta “Nos enfermeronan; Nos futuro.”
Enfermeria ta hunga un papel crucial den e atencion medico y e asistencia di salud, pero hopi biaha no ta ricibi suficiente inversion of reconocemento. Dia Internacional di Enfermeria 2024, ta busca pa cambia e percepcion aki door di demostra cu un mayor inversion den enfermeria por genera beneficio significativo economico y social.
Den e contexto aki, sector di cuido y servicio di Colegio EPI, klas VP4-3A, a celebra Dia di Enfermeria diabierna ultimo, dia 31 di mei, den e auditorio di Colegio EPI. E evento cu a tuma luga for di 8:00 am te cu 1:00 pm, a inclui varios charla cu orador invita.
Entre e oradornan tabat’ey Jeanine Rodriguez di Slachtofferhulp, dr. Kingsale di Respaldo, Juelson van der Biezen di e Servicio di Ambulance ImSan y Rowald Wever, un enfermero cu un amplio specialisacion.
Shomara Anastasia, studiante di VP4-3A, a comenta riba e proposito di e evento. E obhetivo ta pa crea conscientisacion pa nan, como futuro profesional di enfermeria, busca sosten pa nan mes, loke ta permiti nan yuda otro miho.
Alexandra Maduro, tambe un studiante di VP4-3A, a splica cu e evento originalmente tabata programa pa dia 12 di mei, pero debi n’e otro compromisonan di e scol, a pospon’e te cu dia 31 di mei. E programa a enfoca riba “Salud Mebntal”, den cuadro cu e enfoke di WHO p’e aña aki. A invita diferente orador, manera personal di ambulance y psikiatra di Respaldo pa discuti diferente aspecto di salud mental.
Ashley Kramsen, recien graduado den enfermeria nivel 4, a destaca e importancia di e evento. “Awe tabata un dia hopi informativo. No semper ta pone e focus riba salud mental, asina pa mi, mi coleganan y mi famia, tabata un wake up call.”
Josue Jansen, otro graduado den enfermeria, a señala cu e charlanan a siñ’e hopi, specialmente riba e tema di salud mental, kende ainda ta un taboo den nos comunidad. Mester haci cu tanto comunidad como e studiante ta mas consciente di e tema aki.
Juelson van der Biezen, officier van dienst na Servicio di Ambulance, a comparti su experiencia. “Mi a trece mi perspectiva como enfermero, specialmente riba con nos ta lidia cu situacion traumatico. Ta importante p’e studiantenan experencia fo’i trempan loke ta spera nan den futuro y conoce e diferente specialisacionnan disponibel den enfermeria.”
E vento di Colegio EPI no solamente a busca pa celebra Dia di Enfermeria, sino tambe subraya e importancia di salud mental tanto p’e pashentnan como p’e profesionalnan di salud, promoviendo un mayor conscientisacion y preparacion pa enfrenta e futuro retonan den e veld di enfermeria.
E evento a conta cu e sosten di varios patrocinador, incluyendo Divi Impact, Subway Aruba, Sams, Final Touch Barber Shop, My Fitness, Andina Ice, Aruba Aloe, Colegio EPI, Ildo’s Lottery, The Dutch Pancake House, Playa Linda Beach Resort, Gourmet Express, Pruso, Martijn Trading y Ibisa.
