Dia 10 di juni ultimo, Portugal a celebra su dia nacional, Dia di Camoes. Aki na Aruba, e comunidad Portugues tambe a celebra e dia grandi aki.
Diasabra ultimo, Comunidad Portugues a celebra nan dia, Dia di Camoes c’un acto cultural, social na Club Primavera. Nelio Gomes da Silva, President di Fundação Social Cultural Portuguesa a conta cu e anochi tabata un anochi grandi. Nan a presenta un Portugal na Aruba, cu baile, poesia y cuminda tipico.
Un anochi hopi bunita unda cu a honra tambe Manuel da Silva, un personahe hopi conoci na Aruba. Un persona cu a dedica hopi na e fiestanan cultural Portugues. Semper el a para como maestro di ceremonia, pa cual a dedica e celebracion di diasabra na su persona.
E anochi aki a conta tambe cu un banda folklorico unda cu tabatin un grupo di baile di mucha yama Primavera. E tabata un anochi unda cu tabata por a sinti un poco di Portugal riba nos isla.
Varios famia di descendencia Luso Arubano a haci acto di presencia e anochi aki, caminda como comunidad nan tur a bin hunto p’asina celebra e dia aki y pa tambe keda contacto cu e cultura di nan antepasadonan.
Comunidad Portugues su proximo actividad lo ta dia na november proximo pero Club Primavera ta habri tur dia pa asina e comunidad Portugues por keda den estrecho contacto cu otro.
