E team di Cas di Oracion Beato Doctor Jose Gregorio Hernandez tin 25 aña di existencia y bou liderazgo di Suzy Henricus. Nan a cuminsa chikito te cu awe, despues di a haya un tereno for di gobierno, tin nan propio Cas di Oracion den bario di Dakota.
Diahuebs mainta tabatin un otro ceremonia cu ta duna mas bida na e devocion pa e beato aki, cu ya caba a percura pa sanacion di hopi devoto. Despues di a logra nan propio edificio y a cuminsa recolecta firma pa e caya haya tambe nomber di e Beato Doctor Jose Gregorio Hernandez.
A logra haya 921 firma, cu tabata suficiente, pa haci peticion pa cambio di nomber di e caya den Dakota unda cu nan ta ubica. A haya un audiencia cu Prome minister di Aruba, kende a bay di acuerdo pa honra Caya Appeldam na Cas di Oracion Beato dr. Jose Gregorio Hernandez.
Solamente falta pa pone un borchi mas cu ta duna e indicacion aki.
Henricus ta corda ainda cu a construi Cas di Oracion tempo cu e tabata hopi malo y a biaha pa Isnutu, cu ta e bario unda e Beato a nace. El a haci su promesa cu si haya su salud, e lo percura pa un Cas di Oracion.
Beato ta un titulo cu Vaticano ta duna na un candidato prome cu e yega na wordo declara Santo. E grupo di oracion ta kere cu pa fin di aña of cuminsamento di otro aña e lo bira Santo.
“Nos a mira hopi cos pasa y hendenan a bira bon bek, despues di cadena di oracion. Nos tin hopi bon resuiltado.”
Tur diahuebs atardi 6:00 tin oracion y tur e fielnan ta bonbini e momento ey pa haci oracion.
