Aruba a habri su temporada di carnaval cu dos actividad cu a demostra cu ta creciendo bek despues cu a shutdown pa pandemia. Aña pasa caba tabata un señal cu e pueblo ta cla pa sigui cu celebracion di carnal y pa e di 70 celebracion, e eventonan di fin di siman a marca e inicio.
Parada di Flambeu a conta cu mas cu 9 mil participante mientras cu diadomingo anochi a tuma luga eleccion di Prins y Pancho cu ta parti den cuater categoria: Infantil; Hubenil; Grandi y Adulto.
Cherryldine Buckley, coordinado di henter e evento di eleccion di Prins & Pancho tabata hopi entusiasma pa exito di e prome evento. “Prins y Pancho ta un di e actividadnan mas dificil pa hala hende, participante, pasobra normal ta warda te ultimo momento pa inscribi. Pero nos a logra. Nos no tabatin cantidad grandi di participante pero e nivel y calidad di participacion tabata hopi halto.”
Tabatin ocho pareha dividi den diferente categoria.
Loke cu a resalta tambe tabata e publico grandi cu a acudi na e eleccion cu a tuma luga den Centro di Bario Brazil.
Durante e evento aki tambe a probecha pa tira lot pa eleccionnan di Reina. SMAC a trek lot pa secuencia di tur cuater eleccion di reina.
Reina Infantil:
1. Noord
2. Don Flip
3. Little Diamonds
4. Champagne Kids/Paradera
Hubenil
1. Colegio San Antonio/ Dushi Carnival Group
2. Champagne Carnival Group/NTG Dancers
3. TOB/Colegio Arubano
4. Kiwanis Builders Club/Empire Carnival Group
5. Youth Royal Carnival Group
6. Infinity Carnival Group/ Noord
Reina di Carnaval
1. Empire Carnival Group/San Nicolas
2. TOB
3. Infinity Carnival Group/Noord
E eleccion cu mas tanto participante e aña aki sigur t’esun di Sra. Carnaval c’un total di 8 particpante.
Sra. Carnaval:
1. Royal Carnival Group
2. OPC/ Kingdoms Under the Sun
3. EPB O’stad
4. Infinity Carnival Group/Noord
5. Horacio Oduber Hospital
6. TOB/Ritz Carlton Resort
7. Dushi Carnival Group
8. Maria College MAVO/Empire Carnival Group
E ganadonan e anochi aki den categoria Infantil tabata Prins Caya pidi y Pancho Caya Haya (Arnold Malmberg y Jayven Jansen). Nan a representa e grupo di Don Flip.
Den e categoria hubenil tabatin solamente un participacion y esey tabata Prins 70 y Pancho Na Benta (Cayle Vis y Edan Geerman) di Champagne Carnival Group. Automaticamente nan a resulta e Prins y Pancho hubenil di Carnaval 70. Den e categoria Grandi e ganadonan tabata Prins Show y Pancho Time (Samuel Winklaar y Jerwin Mercera) Champagne Carnival Group.
Den e categoria di adulto ganadonan tabata Prins Klap y Pancho E (Anthony Dijkhoff y David Simon) di Adju Upholstery.
SMAC y su comision ta masha gradici na e tres sponsornan grandi cu a coopera pa pone e ambiente carnavalesco den Centro di Bario Brazil: Guardian Group, Setar N.V. y Ban Serio. “Danki pa pone color den e eleccion aki,” tabata mensahe di Cherryldine Buckley.
E siguiente eventonan riba lista ta diahuebs awo cu ta Tumba Infantil, sigui riba diabierna cu e Calypso & Roadmarch Infantil y Hubenil, mientras cu riba diasabra y diadomingo lo tin e eleccionnan di Reina.
Tur cuater dia e eventonan lo tuma luga den Entertainment Center na Dakota.
