Fundashon edukashonal WeConnect en estrecho koperashon ku Asosiashon Mediko di Antias (AMA) ta organisá riba 24 di novèmber próksimo e asina yamá “Care Caribbean Meet-up”.
Riba e fecha akí diferente instansia i profeshonal den e sektor médiko lo bini huntu den World Trade Center na Den Haag. Aki e tema sentral lo trata mehorashon di e konekshon di studiantenan médiko pa ku e profeshonnan vakante ku tin riba e islanan Karibe den Reino Hulandes. E famoso onkólogo yu di Kòrsou Herbert (Bob) Pinedo ta invitado di honor i keynote speaker.
Yunan di tera
Fundashon WeConnect ya pa vários aña ta trahando riba desaroyo di konosementu riba e islanan. Pa medio di e evenemento akí WeConnect ke yuda stimulá studiantenan i profeshonalnan di e islanan di Karibe den Reino Hulandes den e area médiko i di kuido pa regresá nan isla despues di a kompletá nan estudio na Hulanda. Ya komo ku aki ta trata di pèrsonanan ku ta konosí ku e idioma materno, kultura i ku tin un afinidat pa ku e islanan. “E konkurensia den e sektor médiko ta fuerte, pues nos ta boga pa empresarionan pensa riba bon insentivo pa atraé yunan di tera pa regresá. Pensa por ehèmpel riba zùsternan, fisioterapistanan i logopedistanan. Un trayektorio edukashonal atraktivo ta importante pa e generashon akí di young professionals, ta palabranan di Tanja Fraai, mènedjer di WeConnect.
Médikonan hόben
Asosiashon Médiko di Antias (AMA), un asosiashon hóben ku ta konsistí di médikonan di antiguo Antias Hulandes i Aruba den funshon i tambe studiantenan, ke krea un plataforma kaminda petishon i demanda ta bini huntu. Aki ta trata di trese, di un banda, e yunan di tera ku a haña nan edukashon na Hulanda i di otro banda e hòspitalnan i sentronan di kuido na Aruba, Boneiru, Kòrsou, Sint Maarten, Saba i Sint Eustatius huntu. Den e aña ku a pasa AMA a bin ta hasi esfuerso pa hasi un inventarisashon i krea un bista di e studiantenan di antiguo Antias i Aruba den e sektor di kuido na Hulanda, tantu studiantenan komo esnan ku ya ta trahando. Na e momentunan akí e asosiashon ta konsistí di mas di 200 miembro. Presidente di AMA Lung Jeung: “Care Caribbean Meet-up ta duna nos e oportunidat pa diskutí ku tur e gruponan di interes den e sektor médiko riba e islanan kua ta e mihό manera den kual nos por kombiná e oferta i demanda. Nos tin mas ku dos shen (futuro) dὸkter ku ta entusiasmá pa bolbe bèk nan isla”.
Programa
E evenemento lo bai tin un karakter interaktivo i tin komo ophetivo pa krea un strategia riba un término largu pa e yunan di tera. Tópikonan manera prevenshon, edukashon ku un vishon pa futuro i kolaborashon riba nivel di Reino lo bin dilanti. E konosido onkólogo Bob Pinedo, komo role model pa e generashon hóben lo trese un diskurso tokante e trabou ku ya pa años el a bin ta hasi pa su isla natal, Kòrsou. Ministernan di Salubridat Públiko di tur e kuater paisnan den Reino i alabes representante di e diferente hòspitalnan lokal ya a wòrdu aserká pa por duna nan aporte durante e debate ku lo tin pa atraé futuro médiko i paramédikonan pa e islanan. Despues di e seshon plenario lo tin stèntnan kaminda instansianan di kuido i salubridat por presentá nan mes i interkambiá ku esnan presente.
Hopi ánimo
Diferente instansianan di kuido a reakshoná positivamente i a konfirmá nan presensia. Entre otro Horacio Oduber Hospital di Aruba, Sint Maarten Medical Center, Zorgverzekeringskantoor BES i Stichting Zorgverlening Het Wit Gele Kruis di Sint Maarten lo ta na Hulanda pa e evenemento akí. Ya kaba vários studiante i young professionals den e sektor médiko di diferente ramo a inskribí pa e evenemento, manera dietista, anestesiόlogonan, dὸkternan di wowo, i médikonan trahando den diferente spesialismo for di sikiatria te ku kardiologia. “Nos ta hasi nos máksimo esfuerso pa por alkansá un grupo grandi di studiantenan di MBO, HBO i universidat, entre otro via e diferente estudionan na Hulanda”, Tanja Fraai ta splika. Ministerio di Salubridat Públiko Hulandes ta sostené i spὸnser e evenemento akí, ku lo ta grátis pa tur partisipante i invitadonan. Pa mas informashon por konsultá e website: https://www.medikoantiano.com/care-caribbean.
