Den un otro parti di e rapport di Contraloria General riba seis empresa estatal / fundacion di gobierno, a haci un evaluacion extenso di Post Aruba. Y un di e problemanan pisa cu tin eynan ta e contracto colectivo (CAO) cu a vence basta aña caba y ta wordo prolonga, y den e periodo ey dunando incluso e aumento anual. Na final di aña pasa tabatin un decision den corte unda a pospone esaki.
ARA ta bisa cu e principal fuente di entrada di Post Aruba ta di e servicionan postal. Esaki ta anualmente mas cu 70% di e total di entrada. A mira un caida di entrada principalmente desde aña 2020 te cu 2022 (periodo di Covid), y na aña 2021 nan tabatin nan entrada di mas abou cu tabata 2.8 miyon florin.
Den un otro articulo por lesa cu pa hopi aña no a ni adapta e tarifanan. Si esaki a sosode, segun e empresa, esaki lo mester a aumenta cu por lo menos 55% te cu aña 2023.
Aunke cu nan ta consciente cu no por subi e tarifanan abruptamente y fuerte, e empresa ta di opinion cu si ta deseabel pa bini cu aumentonan gradualmente.
Loke ta un problema ta cu e caida den entrada no a bay paralelo cu caida di e gastonan. Loke nan ta logra haya na entrada no ta suficiente pa cubri e gastonan di e empresa. E gastonan empresarial ta casu 186%, respectivamente 189% y 216% di e entrada for di dienstverlening.
Solamente tempo di pandemia, cu a reduci salario cu un poco mas cu 12% por a mira un caida den e gastonan di personal. E cantidad di trahadonan a keda mescos den e periodo ey. Na 2017, 2019 y 2020 tabatin 114 trahado den servicio, na 2018 e tabata 117. Post Aruba no por a pone den practica retiro obliga como consecuencia di e pandemia di Covid-19, debi na restriccionnan administrativo.
Na aña 2021 Post Aruba a introduci e retiro boluntario (VUT) pa reduci e personal. E pago pa e areglo di VUT na e nuebe empleadonan cu a haci uzo di esaki, ta finalisa e aña’ki.
Investigacion ta mustra cu e entradanan cu Post Aruba ta genera, no ta ni suficiente pa cubri su gastonan di personal. E echo cu ta keda mantene na e contenido di e ultimo contracto colectivo (CAO) tambe tin su efecto riba gastonan di personal.
Casi 70% di e gastonan total di e mpresa ta gastonan di personal. Esaki tin di haber cu contenido di e CAO, entre otro aumentonan automatico cu tin consecuencianan negativo pa e empresa.
E ultimo CAO cera ta esun di 2010 pa 2012. Despues di esey no tabatin un CAO nobo y no a adapta e provisionnan den e CAO. Intentonan pa deshaci di e CAO of yega na un acuerdo nobo, no a logra yega na palabracionnan nobo cu ta cuadra cu e actual circunstancianan di e empresa.
Por corda cu aña pasa den luna di october Post a cuminsa un caso sumario, relaciona cu e aumento anual di 105 florin bruto riba salario, conforme e CAO di 2012, y a gana e caso aki. Esaki despues cu algun luna prome un grupo di trahado a gana caso contra Post, cu a obliga nan di duna provision cu ta afecta e situacion financiero di e empresa mas ainda.
Den e caso di october a logra demostra cu desde 2013 nan no ta haci ganashi mas, pero si perdidanan grandi. E empresa a logra mustra corte cu en realidad nan ta failliet pa hopi aña caba, no tin derecho di existencia y ta wordo mantene na bida door di nan unico accionista (pais Aruba). Hues a dicidi e ora cu entrante prome di januari, 2022, Post Aruba no tin e obligacion mas pa aumenta salario di e trahadonan anualmente.
